pas-e-aina

mujhe jamāl-e-badan kā hai e'tirāf magar

maiñ kyā karūñ ki varā-e-badan bhī dekhtā huuñ

ye kā.enāt faqat ek ruḳh nahīñ rakhtī

chaman bhī dekhtā huuñ aur ban bhī dekhtā huuñ

mirī nazar meñ haiñ jab husn ke tamām andāz

maiñ fan bhī dekhtā huuñ fikr-o-fan bhī dekhtā huuñ

nikal gayā huuñ fareb-e-nigāh se aage

maiñ āsmāñ ko shikan-dar-shikan bhī dekhtā huuñ

vo aadmī ki sabhī ro.e jin kī mayyat par

maiñ us ko zer-e-kafan ḳhanda-zan bhī dekhtā huuñ

maiñ jāntā huuñ ki ḳhurshīd hai jalāl-ma.āb

magar ġhurūb se ḳhud ko rihā.ī detā nahīñ

maiñ sochtā huuñ ki chāñd ik jamāl-pāra hai

magar vo ruḳh jo kisī ko dikhā.ī detā nahīñ

maiñ sochtā huuñ haqīqat kā ye tazād hai kyā

ḳhudā jo detā hai sab kuchh ḳhudā.ī detā nahīñ

vo log zauq se aarī haiñ jo ye kahte haiñ

ki ashk TūTtā hai aur sunā.ī detā nahīñ

badan bhī aag hai aur ruuh bhī jahannam hai

mirā qusūr ye hai meñ duhā.ī detā nahīñ

mujhe jamal-e-badan ka hai e'tiraf magar

main kya karun ki wara-e-badan bhi dekhta hun

ye kaenat faqat ek ruKH nahin rakhti

chaman bhi dekhta hun aur ban bhi dekhta hun

meri nazar mein hain jab husn ke tamam andaz

main fan bhi dekhta hun fikr-o-fan bhi dekhta hun

nikal gaya hun fareb-e-nigah se aage

main aasman ko shikan-dar-shikan bhi dekhta hun

wo aadmi ki sabhi roe jin ki mayyat par

main us ko zer-e-kafan KHanda-zan bhi dekhta hun

main jaanta hun ki KHurshid hai jalal-maab

magar ghurub se KHud ko rihai deta nahin

main sochta hun ki chand ek jamal-para hai

magar wo ruKH jo kisi ko dikhai deta nahin

main sochta hun haqiqat ka ye tazad hai kya

KHuda jo deta hai sab kuchh KHudai deta nahin

wo log zauq se aari hain jo ye kahte hain

ki ashk TuTta hai aur sunai deta nahin

badan bhi aag hai aur ruh bhi jahannam hai

mera qusur ye hai mein duhai deta nahin