pas-e-diwar-e-shab

nīm-shab meñ aish-e-bistar chhoḌ kar

kaun mere pīchhe pīchhe aa.egā

aur dekhegā ki maiñ

ek ġhair-ābād masjid meñ

chand anjāne buzurgoñ kī jamā.at meñ

tahajjud paḌh rahā huuñ

kaun dekhegā rijāl-ul-ġhaib mujh se

baat karne meñ magan haiñ

chāñd ko bāhar falak par chhoḌ kar

vaqt kī andhī guphā meñ

duur tak andar pahuñch

aag ke aur raushnī ke ābshāroñ meñ nahātā huuñ

aur isī rishte se bāhar aan kar

chāñd kī gardan meñ apnā haath Daale

anjuman-tā-anjuman āvārgī kā lutf letā huuñ

nīm-shab ko aish-e-bistar chhoḌ kar

nim-shab mein aish-e-bistar chhoD kar

kaun mere pichhe pichhe aaega

aur dekhega ki main

ek ghair-abaad masjid mein

chand anjaane buzurgon ki jamaat mein

tahajjud paDh raha hun

kaun dekhega rijal-ul-ghaib mujh se

baat karne mein magan hain

chand ko bahar falak par chhoD kar

waqt ki andhi gupha mein

dur tak andar pahunch

aag ke aur raushni ke aabshaaron mein nahata hun

aur isi rishte se bahar aan kar

chand ki gardan mein apna hath Dale

anjuman-ta-anjuman aawargi ka lutf leta hun

nim-shab ko aish-e-bistar chhoD kar