pas-e-taqrib-e-mulaqat

pas-e-taqrīb-e-mulāqāt yahāñ shaam Dhale

der tak phailī rahegī tirī shirkat kī mahak

mutarannim se raheñge ye havā ke goshe

jin meñ ġhaltīda hai ab lahn-e-takallum terā

raat bhar phailī rahegī ye ta.assur kī shafaq

jazb hai jis meñ dil-āvez tabassum terā

yaad rah jā.egī is sehn ko ye shām-e-fusūñ

jal ga.ī thiiñ ka.ī an-dekhī suhānī sham.eñ

lau sā de uTThā thā māhaul tire aane kā

chhā gayā thā dar-o-dīvār pe vo partav-e-rañg

jaise māḳhūz hoñ lamhe kisī afsāne se

chhoḌ jā.egā vahī narm kasak phir dil meñ

jis se shādāb hai muddat se mirā zauq-e-talab

aaj taqrīb meñ ye tarz-e-mulāqāt tirā

be-niyāzāna taḳhātub meñ pareshāñ sā tire

gosha-e-lab pe koī harf shanāsā.ī kā

tamkanat vaalī adāoñ meñ anokhā sā niyāz

mujtanib āñkhoñ meñ ik aks pazīrā.ī kā

aam mauzū-e-suḳhan meñ bhī ayaañ lahja-e-ḳhās

zehn kī baat meñ bhī dil kī dhamak kā ehsās

ik tāhum sā kisī ġhamza-e-ġhaltīda meñ

ek mānūs sā ḳham kākul-e-paichīda meñ

tujh se ye rabt ki mauhūm bhī mafhūm bhī hai

tū ki hai mujh se tirī ziist kā har rañg judā

sharh-e-hālāt alag umr kā āhañg sivā

pahle hī raah meñ haa.el hai ḳhalīj-e-aqdār

tū ne tābinda bhī rakkhā hai tirā ḳhatt-e-hisār

phir bhī ik qurb kī ḳhushbū hai fazā meñ bedār

ye rah-o-rasm jo iz.hār-e-mohabbat bhī nahīñ

hai tire dam se ye rāhat ki jo rāhat bhī nahīñ

ġham-e-be-nām tire naam se mausūm bhī hai

husn se rābta-e-ishq ke mazmūñ haiñ bahut

is latāfat-kada-e-kaif meñ afsūñ haiñ bahut

na tire jism kā sandal na tire lab ke gulāb

na tirī zulf kī shabnam hai is ehsās kā naam

yuuñ to is shaam kā paikar bhī hai terā ye jamāl

is shanāsā.ī kā unvāñ hai faqat nik.hat-e-shām

chashm-e-hamdam kī atā-karda ye āsāish-e-dīd

mehrbāñ husn kā baḳhshā huā ye izn-e-kalām

aaj phir jāgtī rah jā.egī har baam tale

vahī shādāb sī hasrat vahī āsūda kasak

der tak phailī rahegī tirī shirkat kī mahak

pas-e-taqrīb-e-mulāqāt yahāñ shaam Dhale

pas-e-taqrib-e-mulaqat yahan sham Dhale

der tak phaili rahegi teri shirkat ki mahak

mutarannim se rahenge ye hawa ke goshe

jin mein ghaltida hai ab lahn-e-takallum tera

raat bhar phaili rahegi ye tassur ki shafaq

jazb hai jis mein dil-awez tabassum tera

yaad rah jaegi is sehn ko ye sham-e-fusun

jal gai thin kai an-dekhi suhani shamen

lau sa de uTTha tha mahaul tere aane ka

chha gaya tha dar-o-diwar pe wo partaw-e-rang

jaise maKHuz hon lamhe kisi afsane se

chhoD jaega wahi narm kasak phir dil mein

jis se shadab hai muddat se mera zauq-e-talab

aaj taqrib mein ye tarz-e-mulaqat tera

be-niyazana taKHatub mein pareshan sa tere

gosha-e-lab pe koi harf shanasai ka

tamkanat wali adaon mein anokha sa niyaz

mujtanib aankhon mein ek aks pazirai ka

aam mauzu-e-suKHan mein bhi ayan lahja-e-KHas

zehn ki baat mein bhi dil ki dhamak ka ehsas

ek tahum sa kisi ghamza-e-ghaltida mein

ek manus sa KHam kakul-e-paichida mein

tujh se ye rabt ki mauhum bhi mafhum bhi hai

tu ki hai mujh se teri zist ka har rang juda

sharh-e-haalat alag umr ka aahang siwa

pahle hi rah mein hael hai KHalij-e-aqdar

tu ne tabinda bhi rakkha hai tera KHatt-e-hisar

phir bhi ek qurb ki KHushbu hai faza mein bedar

ye rah-o-rasm jo izhaar-e-mohabbat bhi nahin

hai tere dam se ye rahat ki jo rahat bhi nahin

gham-e-be-nam tere nam se mausum bhi hai

husn se rabta-e-ishq ke mazmun hain bahut

is latafat-kada-e-kaif mein afsun hain bahut

na tere jism ka sandal na tere lab ke gulab

na teri zulf ki shabnam hai is ehsas ka nam

yun to is sham ka paikar bhi hai tera ye jamal

is shanasai ka unwan hai faqat nikhat-e-sham

chashm-e-hamdam ki ata-karda ye aasaish-e-did

mehrban husn ka baKHsha hua ye izn-e-kalam

aaj phir jagti rah jaegi har baam tale

wahi shadab si hasrat wahi aasuda kasak

der tak phaili rahegi teri shirkat ki mahak

pas-e-taqrib-e-mulaqat yahan sham Dhale