patthar ki zaban

isī akele pahāḌ par tū mujhe milā thā

yahī bulandī hai vasl terā

yahī hai patthar mirī vafā kā

ujaaḌ chaTyal udaas vīrāñ

magar maiñ sadiyoñ se, is se lipTī huī khaḌī huuñ

phaTī huī oḌhnī meñ sāñseñ tirī sameTe

havā ke vahshī bahāo par uḌ rahā hai dāman

sambhālā letī huuñ pattharoñ ko gale lagā kar

nukīle patthar

jo vaqt ke saath mere siine meñ itne gahre utar ga.e haiñ

ki mere jiite lahū se sab aas paas rañgīn ho gayā hai

magar maiñ sadiyoñ se is se lipTī huī khaḌī huuñ

aur ek ūñchī uḌaan vaale parind ke haath

tujh ko paiġhām bhejtī huuñ

tū aa ke dekhe

to kitnā ḳhush ho

ki sañg-reze tamām yāqūt ban ga.e haiñ

damak rahe haiñ

gulāb patthar se ug rahā hai

isi akele pahaD par tu mujhe mila tha

yahi bulandi hai wasl tera

yahi hai patthar meri wafa ka

ujaD chaTyal udas viran

magar main sadiyon se, is se lipTi hui khaDi hun

phaTi hui oDhni mein sansen teri sameTe

hawa ke wahshi bahao par uD raha hai daman

sambhaala leti hun pattharon ko gale laga kar

nukile patthar

jo waqt ke sath mere sine mein itne gahre utar gae hain

ki mere jite lahu se sab aas pas rangin ho gaya hai

magar main sadiyon se is se lipTi hui khaDi hun

aur ek unchi uDan wale parind ke hath

tujh ko paigham bhejti hun

tu aa ke dekhe

to kitna KHush ho

ki sang-reze tamam yaqut ban gae hain

damak rahe hain

gulab patthar se ug raha hai