payam-e-masarrat

bachpan ke ek dost mire ghar pe aa.e the

mere liye payām-e-masarrat vo laa.e the

ya.anī ki un ke beTe kī shādī meñ jā.ūñ maiñ

aur saath un ke murġh-e-musallam uḌā.ūñ maiñ

maiñ ne kahā ki aap takalluf na kījiye

mashġhūl huuñ maiñ aap mujhe baḳhsh dījiye

bole barāt aap nahīñ jā.eñge agar

sun lījiye na jā.ūñgā samdhī ke maiñ bhī ghar

ye baat sun ke maiñ bhī muravvat meñ paḌ gayā

kī arz hai qubūl mujhe hukm aap kā

ḳhush ho ke mere dost ne ik list dī thamā

shajra thā ḳhāndān kā jis meñ likhā huā

bole ki nūr-e-chashm kā sahrā likheñ janāb

misroñ meñ jin ke naam har ik fiT kareñ janāb

maiñ ne kahā ki bhaa.ī mire aisī shart par

mumkin nahīñ ki likh sakūñ maiñ sehra-e-pisar

is list meñ to saikḌoñ logoñ ke naam haiñ

sab naam ek bahr meñ kaise khapā.ūñ maiñ

khetī meñ sher kī nahīñ mumkin hai hal chale

bahr-e-rajaz meñ ya.anī ki bahr-e-ramal chale

bole vo aa ke taish meñ bas jaane dījiye

mat jā.iye barāt ab ārām kījiye

bachpan ke ek dost mere ghar pe aae the

mere liye payam-e-masarrat wo lae the

yani ki un ke beTe ki shadi mein jaun main

aur sath un ke murgh-e-musallam uDaun main

main ne kaha ki aap takalluf na kijiye

mashghul hun main aap mujhe baKHsh dijiye

bole baraat aap nahin jaenge agar

sun lijiye na jaunga samdhi ke main bhi ghar

ye baat sun ke main bhi murawwat mein paD gaya

ki arz hai qubul mujhe hukm aap ka

KHush ho ke mere dost ne ek list di thama

shajra tha KHandan ka jis mein likha hua

bole ki nur-e-chashm ka sahra likhen janab

misron mein jin ke nam har ek fiT karen janab

main ne kaha ki bhai mere aisi shart par

mumkin nahin ki likh sakun main sehra-e-pisar

is list mein to saikDon logon ke nam hain

sab nam ek bahr mein kaise khapaun main

kheti mein sher ki nahin mumkin hai hal chale

bahr-e-rajaz mein yani ki bahr-e-ramal chale

bole wo aa ke taish mein bas jaane dijiye

mat jaiye baraat ab aaram kijiye