gandhi

ek faqīr

ek insāñ paikar-e-iḳhlās rūh-e-rāstī

ik faqīr-e-be-navā īsār jis kī zindagī

jis ke har qaul-o-amal meñ amn kā paiġhām thā

jis kā har iqdām goyā āfiyat-anjām thā

jis kī duniyā bandagī bhagTī surūr-e-jāvedāñ

jis kī duniyā kaif-o-sarmastī kī hāsil be-gumāñ

āshtī thī jis kī fitrat jis kā maz.hab pyaar thā

ḳhidmat-e-insāniyat kā jo alam-bardār thā

azm ne jis ke har ik mushkil ko āsāñ kar diyā

jazba-e-ehsās-e-ḳhuddārī bashar meñ bhar diyā

naaz uThā.e hind ke vo hind kā ġham-ḳhvār thā

kārvān-e-hurriyat kā rahbar-o-sālār thā

ye bhī hai mojiz-bayānī us kī har tahrīr kī

naqsh-e-farsūda se paidā ik na.ī tasvīr kī

ḳhaak se sho.ale uThe aur āsmāñ par chhā ga.e

māh-o-anjum ban ga.e kaun-o-makāñ par chhā ga.e

tīrgī bhāgī jahālat kī fazā chhuTne lagī

haule haule tīra-o-tārīk shab kaTne lagī

har taraf kaif-o-masarrat har taraf nūr-o-surūr

ġhunche ġhunche par tabassum chashm-e-nargis par ġhurūr

ye fusūñ-kārī huī jis ke sabab vo kaun thā

ye junūñ-kārī huī jis ke sabab vo kaun thā

naam thā gāñdhī magar us ke hazāroñ naam haiñ

ek mai-ḳhāna hai jis meñ har tarah ke jaam haiñ

ek faqir

ek insan paikar-e-iKHlas ruh-e-rasti

ek faqir-e-be-nawa isar jis ki zindagi

jis ke har qaul-o-amal mein amn ka paigham tha

jis ka har iqdam goya aafiyat-anjam tha

jis ki duniya bandagi bhagTi surur-e-jawedan

jis ki duniya kaif-o-sarmasti ki hasil be-guman

aashti thi jis ki fitrat jis ka mazhab pyar tha

KHidmat-e-insaniyat ka jo alam-bardar tha

azm ne jis ke har ek mushkil ko aasan kar diya

jazba-e-ehsas-e-KHuddari bashar mein bhar diya

naz uThae hind ke wo hind ka gham-KHwar tha

karwan-e-hurriyat ka rahbar-o-salar tha

ye bhi hai mojiz-bayani us ki har tahrir ki

naqsh-e-farsuda se paida ek nai taswir ki

KHak se shoale uThe aur aasman par chha gae

mah-o-anjum ban gae kaun-o-makan par chha gae

tirgi bhagi jahaalat ki faza chhuTne lagi

haule haule tira-o-tarik shab kaTne lagi

har taraf kaif-o-masarrat har taraf nur-o-surur

ghunche ghunche par tabassum chashm-e-nargis par ghurur

ye fusun-kari hui jis ke sabab wo kaun tha

ye junun-kari hui jis ke sabab wo kaun tha

nam tha gandhi magar us ke hazaron nam hain

ek mai-KHana hai jis mein har tarah ke jam hain