gautam-budh

husn jab afsurda phūloñ kī tarah pāmāl thā

jab mohabbat kā ġhalat duniyā meñ isti.māl thā

be-ḳhudī ke naam par jab daur-e-jām-e-bāda thā

jab taljallī-e-haqīqat se har ik dil saada thā

ziist kā aur maut kā idrāk duniyā ko na thā

zulm kā ehsās jab be-bāk duniyā ko na thā

band āñkheñ kar ke is duniyā ke makrūhāt se

tū ne hāsil kī ziyā-e-dil, tajalliyyāt se

barf-zāroñ ko tire anfās ne garmā diyā

tere istiġhnā ne taḳht-e-saltanat Thukrā diyā

yaad terī aaj bhī hindustāñ meñ taaza hai

chīn, jāpān aur tibbat tak tirā āvāza hai

raushnī jis kī na hogī maañd vo mash.al hai tū

sar-zamīn-e-hind kā irfānī-e-avval hai tū

husn jab afsurda phulon ki tarah pamal tha

jab mohabbat ka ghalat duniya mein istimal tha

be-KHudi ke nam par jab daur-e-jam-e-baada tha

jab taljalli-e-haqiqat se har ek dil sada tha

zist ka aur maut ka idrak duniya ko na tha

zulm ka ehsas jab be-bak duniya ko na tha

band aankhen kar ke is duniya ke makruhat se

tu ne hasil ki ziya-e-dil, tajalliyyat se

barf-zaron ko tere anfas ne garma diya

tere istighna ne taKHt-e-saltanat Thukra diya

yaad teri aaj bhi hindustan mein taza hai

chin, japan aur tibbat tak tera aawaza hai

raushni jis ki na hogi mand wo mashal hai tu

sar-zamin-e-hind ka irfani-e-awwal hai tu