iltija-e-musafir

farishte paḌhte haiñ jis ko vo naam hai terā

baḌī janāb tirī faiz aam hai terā

sitāre ishq ke terī kashish se haiñ qaa.em

nizām-e-mehr kī sūrat nizām hai terā

tirī lahad kī ziyārat hai zindagī dil kī

masīh o ḳhizr se ūñchā maqām hai terā

nihāñ hai terī mohabbat meñ rañg-e-mahbūbī

baḌī hai shaan baḌā ehtirām hai terā

agar siyāh dilam dāġh-e-lāla-zār-e-tavām

digar kushāda jabīnam gul-e-bahār-e-tavām

chaman ko chhoḌ ke niklā huuñ misl-e-nik.hat-e-gul

huā hai sabr kā manzūr imtihāñ mujh ko

chalī hai le ke vatan ke nigār-ḳhāne se

sharāb-e-ilm kī lazzat kashāñ kashāñ mujh ko

nazar hai abr-e-karam par daraḳht-e-sahrā huuñ

kiyā ḳhudā ne na mohtāj-e-bāġhbāñ mujh ko

falak-nashīñ sifat-e-mehr huuñ zamāne meñ

tirī duā se atā ho vo nardbāñ mujh ko

maqām ham-safaroñ se ho is qadar aage

ki samjhe manzil-e-maqsūd kārvāñ mujh ko

mirī zabān-e-qalam se kisī kā dil na dukhe

kisī se shikva na ho zer-e-āsmāñ mujh ko

diloñ ko chaak kare misl-e-shāna jis kā asar

tirī janāb se aisī mile fuġhāñ mujh ko

banāyā thā jise chun chun ke ḳhaar o ḳhas maiñ ne

chaman meñ phir nazar aa.e vo āshiyāñ mujh ko

phir aa rakhūñ qadam-e-mādar-o-pidar pe jabīñ

kiyā jinhoñ ne mohabbat kā rāz-dāñ mujh ko

vo sham-e-bārgah-e-ḳhāndān-e-murtazvī

rahegā misl-e-haram jis kā āstāñ mujh ko

nafas se jis ke khilī merī aarzū kī kalī

banāyā jis kī muravvat ne nukta-dāñ mujh ko

duā ye kar ki ḳhudāvand-e-āsmān-o-zamīñ

kare phir us kī ziyārat se shādmāñ mujh ko

vo merā yūsuf-e-sānī vo sham-e-mahfil-e-ishq

huī hai jis kī uḳhuvvat qarār-e-jāñ mujh ko

jalā ke jis kī mohabbat ne daftar-e-man-o-tū

havā-e-aish meñ paalā kiyā javāñ mujh ko

riyāz-e-dahr meñ mānind-e-gul rahe ḳhandāñ

ki hai azīz-tar az-jāñ vo jān-e-jāñ mujh ko

shagufta ho ke kalī dil kī phuul ho jaa.e

ye iltijā-e-musāfir qubūl ho jaa.e

farishte paDhte hain jis ko wo nam hai tera

baDi janab teri faiz aam hai tera

sitare ishq ke teri kashish se hain qaem

nizam-e-mehr ki surat nizam hai tera

teri lahad ki ziyarat hai zindagi dil ki

masih o KHizr se uncha maqam hai tera

nihan hai teri mohabbat mein rang-e-mahbubi

baDi hai shan baDa ehtiram hai tera

agar siyah dilam dagh-e-lala-zar-e-tawam

digar kushada jabinam gul-e-bahaar-e-tawam

chaman ko chhoD ke nikla hun misl-e-nikhat-e-gul

hua hai sabr ka manzur imtihan mujh ko

chali hai le ke watan ke nigar-KHane se

sharab-e-ilm ki lazzat kashan kashan mujh ko

nazar hai abr-e-karam par daraKHt-e-sahra hun

kiya KHuda ne na mohtaj-e-baghban mujh ko

falak-nashin sifat-e-mehr hun zamane mein

teri dua se ata ho wo nardban mujh ko

maqam ham-safaron se ho is qadar aage

ki samjhe manzil-e-maqsud karwan mujh ko

meri zaban-e-qalam se kisi ka dil na dukhe

kisi se shikwa na ho zer-e-asman mujh ko

dilon ko chaak kare misl-e-shana jis ka asar

teri janab se aisi mile fughan mujh ko

banaya tha jise chun chun ke KHar o KHas main ne

chaman mein phir nazar aae wo aashiyan mujh ko

phir aa rakhun qadam-e-madar-o-pidar pe jabin

kiya jinhon ne mohabbat ka raaz-dan mujh ko

wo sham-e-bargah-e-KHandan-e-murtazwi

rahega misl-e-haram jis ka aastan mujh ko

nafas se jis ke khili meri aarzu ki kali

banaya jis ki murawwat ne nukta-dan mujh ko

dua ye kar ki KHudawand-e-asman-o-zamin

kare phir us ki ziyarat se shadman mujh ko

wo mera yusuf-e-sani wo sham-e-mahfil-e-ishq

hui hai jis ki uKHuwwat qarar-e-jaan mujh ko

jala ke jis ki mohabbat ne daftar-e-man-o-tu

hawa-e-aish mein pala kiya jawan mujh ko

riyaz-e-dahr mein manind-e-gul rahe KHandan

ki hai aziz-tar az-jaan wo jaan-e-jaan mujh ko

shagufta ho ke kali dil ki phul ho jae

ye iltija-e-musafir qubul ho jae