iqbaal

aayā hamāre des meñ ik ḳhush-navā faqīr

aayā aur apnī dhun meñ ġhazal-ḳhvāñ guzar gayā

sunsān rāheñ ḳhalq se ābād ho ga.iiñ

vīrān mai-kadoñ kā nasība sañvar gayā

thiiñ chand hī nigāheñ jo us tak pahuñch sakīñ

par us kā giit sab ke diloñ meñ utar gayā

ab duur jā chukā hai vo shāh-e-gadā-numā

aur phir se apne des kī rāheñ udaas haiñ

chand ik ko yaad hai koī us kī adā-e-ḳhās

do ik nigāheñ chand azīzoñ ke paas haiñ

par us kā giit sab ke diloñ meñ muqīm hai

aur us ke lai se saikaḌoñ lazzat-shanās haiñ

is giit ke tamām mahāsin haiñ lā-zavāl

is kā vafūr is kā ḳharosh is kā soz-o-sāz

ye giit misal-e-shola-e-javvāla tund-o-tez

is kī lapak se bād-e-fanā kā jigar gudāz

jaise charāġh vahshat-e-sar-sar se be-ḳhatar

yā sham-e-bazm sub.h kī aamad se be-ḳhabar

aaya hamare des mein ek KHush-nawa faqir

aaya aur apni dhun mein ghazal-KHwan guzar gaya

sunsan rahen KHalq se aabaad ho gain

viran mai-kadon ka nasiba sanwar gaya

thin chand hi nigahen jo us tak pahunch sakin

par us ka git sab ke dilon mein utar gaya

ab dur ja chuka hai wo shah-e-gada-numa

aur phir se apne des ki rahen udas hain

chand ek ko yaad hai koi us ki ada-e-KHas

do ek nigahen chand azizon ke pas hain

par us ka git sab ke dilon mein muqim hai

aur us ke lai se saikaDon lazzat-shanas hain

is git ke tamam mahasin hain la-zawal

is ka wafur is ka KHarosh is ka soz-o-saz

ye git misal-e-shola-e-jawwala tund-o-tez

is ki lapak se baad-e-fana ka jigar gudaz

jaise charagh wahshat-e-sar-sar se be-KHatar

ya sham-e-bazm subh ki aamad se be-KHabar