iqbaal ke mazar par

lahad meñ so rahī hai aaj be-shak musht-e-ḳhāk us kī

magar garm-e-amal hai jāgtī hai jān-e-pāk us kī

vo ik faanī bashar thā maiñ ye bāvar kar nahīñ saktā

bashar iqbāl ho jaa.e to hargiz mar nahīñ saktā

ba-zer-e-sāya-e-dīvār-e-masjid hai jo āsūda

ye ḳhākī jism hai sattar baras kā raah paimūda

ye ḳhākī jism bhī us kā bahut hī besh-qīmat thā

jise ham-jalva samjhe the vo parda bhī ġhanīmat thā

use ham nāpte the le ke āñkhoñ hī kā paimānā

ġhazal-ḳhvāñ us ko jaanā ham ne shā.ir us ko gardānā

faqat sūrat hī dekhī us ke ma.anī ham nahīñ samjhe

na dekhā rañg-e-tasvīr aa.ine ko dil-nashīñ samjhe

hameñ zof-e-basārat se kahāñ thī tāb-e-nazzārā

sikhā.e us ke parde ne hameñ ādāb-e-nazzārā

ye naġhma kyā hai zer-e-parda-hā-e-sāz kam samjhe

rahe sab gosh-bar-āvāz lekin raaz kam samjhe

shikast-e-paikar-e-mahsūs ne toḌā hijāb āḳhir

tulū-e-sub.h-e-mahshar ban ke chamkā āftāb āḳhir

muqayyad ab nahīñ 'iqbāl' apne jism-e-fānī meñ

nahīñ vo band haa.il aaj dariyā kī ravānī meñ

vajūd-e-marg kī qaa.el nahīñ thī zindagī us kī

ta.ālā allāh ab dekhe koī pā.indagī us kī

jise ham murda samjhe zinda tar pā.inda tar niklā

mah o ḳhurshīd se zarre kā dil tābinda tar niklā

abhī andāza ho saktā nahīñ us kī bulandī kā

abhī duniyā kī āñkhoñ par hai parda firqa-bandī kā

magar merī nigāhoñ meñ haiñ chehre un javānoñ ke

jinheñ 'iqbāl' ne baḳhshe haiñ baazū qahar-mānoñ ke

lahad mein so rahi hai aaj be-shak musht-e-KHak us ki

magar garm-e-amal hai jagti hai jaan-e-pak us ki

wo ek fani bashar tha main ye bawar kar nahin sakta

bashar iqbaal ho jae to hargiz mar nahin sakta

ba-zer-e-saya-e-diwar-e-masjid hai jo aasuda

ye KHaki jism hai sattar baras ka rah paimuda

ye KHaki jism bhi us ka bahut hi besh-qimat tha

jise ham-jalwa samjhe the wo parda bhi ghanimat tha

use hum napte the le ke aankhon hi ka paimana

ghazal-KHwan us ko jaana hum ne shair us ko gardana

faqat surat hi dekhi us ke mani hum nahin samjhe

na dekha rang-e-taswir aaine ko dil-nashin samjhe

hamein zof-e-basarat se kahan thi tab-e-nazzara

sikhae us ke parde ne hamein aadab-e-nazzara

ye naghma kya hai zer-e-parda-ha-e-saz kam samjhe

rahe sab gosh-bar-awaz lekin raaz kam samjhe

shikast-e-paikar-e-mahsus ne toDa hijab aaKHir

tulu-e-subh-e-mahshar ban ke chamka aaftab aaKHir

muqayyad ab nahin 'iqbaal' apne jism-e-fani mein

nahin wo band hail aaj dariya ki rawani mein

wajud-e-marg ki qael nahin thi zindagi us ki

taala allah ab dekhe koi paindagi us ki

jise hum murda samjhe zinda tar painda tar nikla

mah o KHurshid se zarre ka dil tabinda tar nikla

abhi andaza ho sakta nahin us ki bulandi ka

abhi duniya ki aankhon par hai parda firqa-bandi ka

magar meri nigahon mein hain chehre un jawanon ke

jinhen 'iqbaal' ne baKHshe hain bazu qahar-manon ke