mir

shāhid-e-bazm-e-suḳhan nāzūra-e-ma.anī-tarāz

ai ḳhudā-e-reḳhta paiġhambar-e-soz-o-gudāz

yūsuf-e-mulk-e-ma.ānī pīr-e-kan.ān-e-suḳhan

hai tirī har bait ahl-e-dard ko bait-ul-huzan

ai shahīd-e-jalva-e-mānī faqīr-e-be-niyāz

is tarah kis ne kahī hai dāstān-e-soz-o-sāz

hai adab urdu kā nāzāñ jis pe vo hai terī zaat

sar-zamīn-e-sher par ai chashma-e-āb-e-hayāt

tafta-dil āshufta-sar ātish-navā be-ḳheshtan

aah terī sīna-soz aur naala terā dil-shikan

ḳhatm tujh par ho gayā lutf-e-bayān-e-āshiqī

marhabā ai vāqif-e-rāz-e-nihān-e-āshiqī

sar-zamīn-e-sher ka.aba aur tū is kā ḳhalīl

shāḳh-e-tūbā-e-suḳhan par hamnavā-e-jibra.īl

josh-e-istiġhnā tirā tere liye vaj.h-e-nashāt

shān-e-ḳhuddārī tirī ā.īna-dār-e-ehtiyāt

bazm se guzrā kamāl-e-faqr dikhlātā huā

tāj-e-shāhī pā-e-istiġhnā se Thukrātā huā

thā dimāġh-o-dil meñ sahbā-e-qanāt kā surūr

thī javāb-e-satvat-e-shāhī tirī tab-e-ġhayūr

mauja-e-bahr-e-qanāt terī abrū kī shikan

taḳht-e-shāhī par hasīr-e-faqr terā ḳhanda-zan

thā ye jauhar terī fitrī shā.irī ke rutba-dāñ

izzat-e-fan thī tirī nāzuk-mizājī meñ nihāñ

multafit kartā tujhe kyā aġhniyā kā karr-o-farr

thā tirī rag rag meñ durveshoñ kī sohbat kā asar

dil tirā zaḳhmoñ se bazm-e-āshiqī meñ chuur hai

jis suḳhan ko dekhiye ristā huā nāsūr hai

bazm-gāh-e-husn meñ ik partav-e-faiz-e-jamāl

said-gāh-e-ishq meñ hai ek said-e-ḳhasta-hāl

dekhnā ho gar tujhe dekhe tire afkār meñ

hai tirī tasvīr tere ḳhūñ-chakāñ ash.ār meñ

sair ke qābil hai dil sad-pāra us naḳhchīr kā

jis ke har TukḌe meñ ho paivast paikāñ tiir kā

āsmān-e-sher par chamke haiñ sayyāre bahut

apnī apnī raushnī dikhlā ga.e taare bahut

ahd-e-gul hai aur vahī rañgīnī-e-gulzār hai

ḳhāk-e-hind ab tak agar dekho tajallī-zār hai

aur bhī haiñ ma.arke meñ shahsavār-e-yakka-tāz

aur bhī haiñ mai-kade meñ sāqiyān-e-dil-navāz

haiñ to paimāne vahī lekin vo mai miltī nahīñ

naġhma-sanjoñ meñ kisī se terī lai miltī nahīñ

sāhibān-e-zauq ke sīnoñ meñ thī jis kī khaTak

tairte haiñ dil meñ vo sar-tez nashtar aaj tak

kārvān-e-rafta ko thā terī yaktā.ī pe naaz

asr-e-maujūda ne bhī maanā hai terā imtiyāz

ho ga.e haiñ aaj tujh ko ek sau bā.īs saal

to nahīñ zinda hai duniyā meñ magar terā kamāl

haq hai ham par yaad kar ke tujh ko ronā chāhiye

mātam apnī nā-shanāsī kā bhī honā chāhiye

DhūñDte haiñ qabr kā bhī ab nishāñ miltā nahīñ

ai zamīñ tujh meñ hamārā āsmāñ miltā nahīñ

shahid-e-bazm-e-suKHan nazura-e-mani-taraaz

ai KHuda-e-reKHta paighambar-e-soz-o-gudaz

yusuf-e-mulk-e-maani pir-e-kanan-e-suKHan

hai teri har bait ahl-e-dard ko bait-ul-huzan

ai shahid-e-jalwa-e-mani faqir-e-be-niyaz

is tarah kis ne kahi hai dastan-e-soz-o-saz

hai adab urdu ka nazan jis pe wo hai teri zat

sar-zamin-e-sher par ai chashma-e-ab-e-hayat

tafta-dil aashufta-sar aatish-nawa be-KHeshtan

aah teri sina-soz aur nala tera dil-shikan

KHatm tujh par ho gaya lutf-e-bayan-e-ashiqi

marhaba ai waqif-e-raaz-e-nihan-e-ashiqi

sar-zamin-e-sher kaba aur tu is ka KHalil

shaKH-e-tuba-e-suKHan par hamnawa-e-jibrail

josh-e-istighna tera tere liye wajh-e-nashat

shan-e-KHuddari teri aaina-dar-e-ehtiyat

bazm se guzra kamal-e-faqr dikhlata hua

taj-e-shahi pa-e-istighna se Thukraata hua

tha dimagh-o-dil mein sahba-e-qanat ka surur

thi jawab-e-satwat-e-shahi teri tab-e-ghayur

mauja-e-bahr-e-qanat teri abru ki shikan

taKHt-e-shahi par hasir-e-faqr tera KHanda-zan

tha ye jauhar teri fitri shairi ke rutba-dan

izzat-e-fan thi teri nazuk-mizaji mein nihan

multafit karta tujhe kya aghniya ka karr-o-farr

tha teri rag rag mein durweshon ki sohbat ka asar

dil tera zaKHmon se bazm-e-ashiqi mein chur hai

jis suKHan ko dekhiye rista hua nasur hai

bazm-gah-e-husn mein ek partaw-e-faiz-e-jamal

said-gah-e-ishq mein hai ek said-e-KHasta-haal

dekhna ho gar tujhe dekhe tere afkar mein

hai teri taswir tere KHun-chakan ashaar mein

sair ke qabil hai dil sad-para us naKHchir ka

jis ke har TukDe mein ho paiwast paikan tir ka

aasman-e-sher par chamke hain sayyare bahut

apni apni raushni dikhla gae tare bahut

ahd-e-gul hai aur wahi rangini-e-gulzar hai

KHak-e-hind ab tak agar dekho tajalli-zar hai

aur bhi hain marke mein shahsawar-e-yakka-taz

aur bhi hain mai-kade mein saqiyan-e-dil-nawaz

hain to paimane wahi lekin wo mai milti nahin

naghma-sanjon mein kisi se teri lai milti nahin

sahiban-e-zauq ke sinon mein thi jis ki khaTak

tairte hain dil mein wo sar-tez nashtar aaj tak

karwan-e-rafta ko tha teri yaktai pe naz

asr-e-maujuda ne bhi mana hai tera imtiyaz

ho gae hain aaj tujh ko ek sau bais sal

to nahin zinda hai duniya mein magar tera kamal

haq hai hum par yaad kar ke tujh ko rona chahiye

matam apni na-shanasi ka bhi hona chahiye

DhunDte hain qabr ka bhi ab nishan milta nahin

ai zamin tujh mein hamara aasman milta nahin