saneha

dard-o-ġham-e-hayāt kā darmāñ chalā gayā

vo ḳhizr-e-asr-o-īsa-e-daurāñ chalā gayā

hindū chalā gayā na musalmāñ chalā gayā

insāñ kī justujū meñ ik insāñ chalā gayā

raqsāñ chalā gayā na ġhazal-ḳhvāñ chalā gayā

soz-o-gudāz o dard meñ ġhaltāñ chalā gayā

barham hai zulf-e-kufr to īmāñ sar-nigūñ

vo faḳhr-e-kufr o nāzish-e-īmāñ chalā gayā

bīmār zindagī kī kare kaun dil-dahī

nabbāz o chārasāz-e-marīzāñ chalā gayā

kis kī nazar paḌegī ab ''isyāñ'' pe lutf kī

vo mahram-e-nazākat-e-isyāñ chalā gayā

vo rāz-dār-er-mahfil-e-yārāñ nahīñ rahā

vo ġham-gusār-e-bazm-e-arīfāñ chalā gayā

ab kāfirī meñ rasm-o-rāh-e-dilbarī nahīñ

īmāñ kī baat ye hai ki īmāñ chalā gayā

ik be-ḳhud-e-surūr-e-dil-o-jāñ nahīñ rahā

ik āshiq-e-sadāqat-e-pinhāñ chalā gayā

bā-chashm-e-nam hai aaj zuleḳhā-e-kā.enāt

zindāñ-shikan vo yūsuf-e-zindāñ chalā gayā

ai aarzū vo chashma-e-haivāñ na kar talāsh

zulmāt se vo chashma-e-haivāñ chalā gayā

ab sañg-o-ḳhisht o ḳhaak o ḳhazaf sar-buland haiñ

tāj-e-vatan kā la.al-e-daraḳhshāñ chalā gayā

ab ahrman ke haath meñ hai teġh-e-ḳhūñ-chakāñ

ḳhush hai ki dast-o-bāzū-e-yazdāñ chalā gayā

dev-e-badī se mārk-e-saḳht hī sahī

ye to nahīñ ki zor-e-javānāñ chalā gayā

kyā ahl-e-dil meñ jazba-e-ġhairat nahīñ rahā

kyā azm-e-sar-faroshī-e-mardāñ chalā gayā

kyā bāġhiyoñ kī ātish-e-dil sard ho ga.ī

kyā sarkashoñ kā jazba-e-pinhāñ chalā gayā

kyā vo junūn-o-jazba-e-bedār mar gayā

kyā vo shabāb-e-hashr-badāmāñ chalā gayā

ḳhush hai badī jo daam ye nekī pe Daal ke

rakh deñge ham badī kā kaleja nikāl ke

dard-o-gham-e-hayat ka darman chala gaya

wo KHizr-e-asr-o-isa-e-dauran chala gaya

hindu chala gaya na musalman chala gaya

insan ki justuju mein ek insan chala gaya

raqsan chala gaya na ghazal-KHwan chala gaya

soz-o-gudaz o dard mein ghaltan chala gaya

barham hai zulf-e-kufr to iman sar-nigun

wo faKHr-e-kufr o nazish-e-iman chala gaya

bimar zindagi ki kare kaun dil-dahi

nabbaz o chaarasaz-e-marizan chala gaya

kis ki nazar paDegi ab isyan pe lutf ki

wo mahram-e-nazakat-e-isyan chala gaya

wo raaz-dar-er-mahfil-e-yaran nahin raha

wo gham-gusar-e-bazm-e-arifan chala gaya

ab kafiri mein rasm-o-rah-e-dilbari nahin

iman ki baat ye hai ki iman chala gaya

ek be-KHud-e-surur-e-dil-o-jaan nahin raha

ek aashiq-e-sadaqat-e-pinhan chala gaya

ba-chashm-e-nam hai aaj zuleKHa-e-kaenat

zindan-shikan wo yusuf-e-zindan chala gaya

ai aarzu wo chashma-e-haiwan na kar talash

zulmat se wo chashma-e-haiwan chala gaya

ab sang-o-KHisht o KHak o KHazaf sar-buland hain

taj-e-watan ka lal-e-daraKHshan chala gaya

ab ahrman ke hath mein hai tegh-e-KHun-chakan

KHush hai ki dast-o-bazu-e-yazdan chala gaya

dew-e-badi se mark-e-saKHt hi sahi

ye to nahin ki zor-e-jawanan chala gaya

kya ahl-e-dil mein jazba-e-ghairat nahin raha

kya azm-e-sar-faroshi-e-mardan chala gaya

kya baghiyon ki aatish-e-dil sard ho gai

kya sarkashon ka jazba-e-pinhan chala gaya

kya wo junun-o-jazba-e-bedar mar gaya

kya wo shabab-e-hashr-badaman chala gaya

KHush hai badi jo dam ye neki pe Dal ke

rakh denge hum badi ka kaleja nikal ke