pesh lafz ek mohabbat name ka

kamre kī sīlan se uktā kar

kahīñ chalī ga.ī hai

mere hisse kī dhuup

bandhan se Darne vaalī chiḌiyā

uḌ rahī hai khokhle ākāsh meñ

aur maiñ

maiñ to istiqbāl bhī nahīñ kar saktā

kisī na.ī aahaT kā

kyūñki Dar gayā huuñ maiñ

aate hue qadmoñ kī

lauTtī huī bāzgasht se

merī āñkhoñ meñ jam ga.ī hai

udaas lū bharī dopahar

himāla kī choTī par jamne vaalī barf kī taraf

maiñ bhuul chukā huuñ

amaltās ke phuul se apnā pahlā mukālima

kamre ke kis darvāze se

khiḌkī se yā rauzan se

dāḳhil huī thī sūraj kī pahlī kiran

mujhe kuchh yaad nahīñ

ek behad masrūf lamhe ke liye

sambhāl rakkhā thā maiñ ne

bahut saarā ḳhālī vaqt

apnī āñkhoñ meñ

apne hoñToñ par

apnī bāñhoñ ke TūTte hue ghere meñ

be-hañgam ḳhvāboñ ke bikharte dā.ere meñ

kisī basantī jism ke pahle tyauhār meñ

adhūrā chhoḌ aayā maiñ apnā raqs

mere ishq se kahīñ ziyāda lambī thī

mere prem patr kī bhūmikā

kamre ki silan se ukta kar

kahin chali gai hai

mere hisse ki dhup

bandhan se Darne wali chiDiya

uD rahi hai khokhle aakash mein

aur main

main to istiqbaal bhi nahin kar sakta

kisi nai aahaT ka

kyunki Dar gaya hun main

aate hue qadmon ki

lauTti hui bazgasht se

meri aankhon mein jam gai hai

udas lu bhari dopahar

himala ki choTi par jamne wali barf ki taraf

main bhul chuka hun

amaltas ke phul se apna pahla mukalima

kamre ke kis darwaze se

khiDki se ya rauzan se

daKHil hui thi suraj ki pahli kiran

mujhe kuchh yaad nahin

ek behad masruf lamhe ke liye

sambhaal rakkha tha main ne

bahut sara KHali waqt

apni aankhon mein

apne honTon par

apni banhon ke TuTte hue ghere mein

be-hangam KHwabon ke bikharte daere mein

kisi basanti jism ke pahle tyauhaar mein

adhura chhoD aaya main apna raqs

mere ishq se kahin ziyaada lambi thi

mere prem patr ki bhumika