phul barsao shahidan-e-watan ki KHak par

jin sar-afrāzoñ kī rūheñ aaj haiñ aflāk par

maut ḳhud hairāñ thī jin kī jur.at-e-be-bāk par

naqsh jin ke naam haiñ ab tak dil-e-ġhamnāk par

rahmat-e-īzad ho daa.im in kī jān-e-pāk par

phuul barsāo shahīdān-e-vatan kī ḳhaak par

phuul barsāo ki phūloñ meñ hai ḳhushbu-e-vafā

thī sarisht-e-pāk in kī āshiq-e-jū-e-vafā

maut par un kī ga.e jo rū-e-dar-rū-e-vafā

kyuuñ na hoñ ahl-e-vatan ke ashk-e-ḳhūñ jū-e-vafā

phuul barsāo shahīdān-e-vatan kī ḳhaak par

the vo faḳhr-e-ādamiyat iftiḳhār-e-zindagī

the vo insāñ turra-e-tāj-e-vaqār-e-zindagī

un ke dam se thā chaman ye ḳhār-zār-e-zindagī

thā nafas un kā nasīm-e-ḳhush-gavār-e-zindagī

phuul barsāo shahīdān-e-vatan kī ḳhaak par

chashm-e-zāhir-bīñ samajhtī hai ki bas vo mar ga.e

dar-haqīqat maut ko faanī vo sābit kar ga.e

jo vatan ke vāste kaTvā ke apne sar ga.e

ḳhuuñ se apne rañg tasvīr-e-vafā meñ bhar ga.e

phuul barsāo shahīdān-e-vatan kī ḳhaak par

dekh lenā ḳhūn-e-nāhaq rañg ik din lā.egā

ḳhud-ġharaz zālim kiye par apne ḳhud pachhtā.egā

raah par daur-e-zamāñ āḳhir kabhī to aa.egā

āsmāñ is ḳhaak kī taqdīr ko chamkā.egā

phuul barsāo shahīdān-e-vatan kī ḳhaak par

jin sar-afraazon ki ruhen aaj hain aflak par

maut KHud hairan thi jin ki jurat-e-be-bak par

naqsh jin ke nam hain ab tak dil-e-ghamnak par

rahmat-e-izad ho daim in ki jaan-e-pak par

phul barsao shahidan-e-watan ki KHak par

phul barsao ki phulon mein hai KHushbu-e-wafa

thi sarisht-e-pak in ki aashiq-e-ju-e-wafa

maut par un ki gae jo ru-e-dar-ru-e-wafa

kyun na hon ahl-e-watan ke ashk-e-KHun ju-e-wafa

phul barsao shahidan-e-watan ki KHak par

the wo faKHr-e-adamiyat iftiKHar-e-zindagi

the wo insan turra-e-taj-e-waqar-e-zindagi

un ke dam se tha chaman ye KHar-zar-e-zindagi

tha nafas un ka nasim-e-KHush-gawar-e-zindagi

phul barsao shahidan-e-watan ki KHak par

chashm-e-zahir-bin samajhti hai ki bas wo mar gae

dar-haqiqat maut ko fani wo sabit kar gae

jo watan ke waste kaTwa ke apne sar gae

KHun se apne rang taswir-e-wafa mein bhar gae

phul barsao shahidan-e-watan ki KHak par

dekh lena KHun-e-nahaq rang ek din laega

KHud-gharaz zalim kiye par apne KHud pachhtaega

rah par daur-e-zaman aaKHir kabhi to aaega

aasman is KHak ki taqdir ko chamkaega

phul barsao shahidan-e-watan ki KHak par