pichhle-pahar ke sannaTe mein

pichhle pahr ke sannāTe meñ

kis kī siskī kis kā naala

kamre kī ḳhāmosh fazā meñ dar aayā hai

zor havā kā TuuT chukā hai

khule darīche kī jaalī se

nannhī nannhī būñdeñ chhan kar

sab konoñ meñ phail ga.ī haiñ

aur mire ashkoñ se

un ke haath kā takiya bhiig gayā hai

kitnī zālim

kitnī gahrī tārīkī hai

khulā darīcha thar-thar-thar-thar kaañp rahā hai

bhīgī miTTī sauñdhī ḳhushbū chhoḌ rahī hai

uude bādal

kaale ambar kī jhīloñ meñ Duub ga.e haiñ

kis ke ruḳhsāroñ kī larzish dekh rahā huuñ

kis kī zulfoñ kī shiknoñ se khel rahā huuñ

chupke chupke leTe leTe soch rahā huuñ

pichhle pahr kā sannāTā hai

kis kī siskī kis kā naala

kamre kī ḳhāmosh fazā meñ dar aayā hai

ghane daraḳhtoñ meñ purvā kī siiTī gūñjī

do dikshoñ meñ qaidī rūheñ chīḳh rahī haiñ

konoñ meñ dubke hue jhīñgar chillāte haiñ

mehrāboñ se bhūtoñ ke sar Takrāte haiñ

qil.e ke ik burj ke andar

ek parī (shīlāT kī rānī)

ḳhandaq ke an-dekhe paanī kī gahrā.ī

andeshe ke bālishtoñ se maap rahī hai

maazī kī DevḌhī kī chilman

khule darīche kī jaalī se

chhan chhan aa.eñ

ruup kī jot hinā kī laalī kal kī yādeñ

sauñdhī ḳhushbū ThanDī būñdeñ

kal ke baasī aañsū jin se

fardā ke bālīñ kā pardā bhiig rahā hai

sehr-zada mahbūs hasīna

sapnoñ ke shīlāT kī raanī

ā.īnoñ meñ husn-e-shikasta dekh rahī hai

kitne chehre TuuTe TuuTe

pahchāne an-pahchāne se

aage pīchhe aage pīchhe bhaag rahe haiñ

qil.e ke aaseb kī sūrat kis kī siskī kis kā naala

kamre kī ḳhāmosh fazā meñ dar aayā hai

bichhḌe logo piyāre logo

chāheñ bhī to naam tumhāre jaan sakeñge?

kaise māneñ tum ko hamāre

jī lene kī mar lene kī

ḳhushī huī afsos huā hai

tum kyā jaano

kis ke haath kā takiya

kis ke garm ashkoñ se bhiig rahā hai

khule darīche kī jaalī se chimTī āñkho

ik lamhe ke kauñde meñ tum

kin kin ajnabī chīzoñ ko pahchān sakogī

jīvan-khel meñ haare logo

bichhḌe logo piyāre logo

barkhā kī lambī rātoñ meñ

kamre kī ḳhāmosh fazā meñ

pichhle pahr ke sannāTe meñ

rote rote jāgne vaale

ham logoñ ko so lene do

aur saverā ho lene do

pichhle pahr ke sannaTe mein

kis ki siski kis ka nala

kamre ki KHamosh faza mein dar aaya hai

zor hawa ka TuT chuka hai

khule dariche ki jali se

nannhi nannhi bunden chhan kar

sab konon mein phail gai hain

aur mere ashkon se

un ke hath ka takiya bhig gaya hai

kitni zalim

kitni gahri tariki hai

khula daricha thar-thar-thar-thar kanp raha hai

bhigi miTTi saundhi KHushbu chhoD rahi hai

ude baadal

kale ambar ki jhilon mein Dub gae hain

kis ke ruKHsaron ki larzish dekh raha hun

kis ki zulfon ki shiknon se khel raha hun

chupke chupke leTe leTe soch raha hun

pichhle pahr ka sannaTa hai

kis ki siski kis ka nala

kamre ki KHamosh faza mein dar aaya hai

ghane daraKHton mein purwa ki siTi gunji

do dikshon mein qaidi ruhen chiKH rahi hain

konon mein dubke hue jhingar chillate hain

mehrabon se bhuton ke sar Takraate hain

qile ke ek burj ke andar

ek pari (shilaT ki rani)

KHandaq ke an-dekhe pani ki gahrai

andeshe ke baalishton se map rahi hai

mazi ki DewDhi ki chilman

khule dariche ki jali se

chhan chhan aaen

rup ki jot hina ki lali kal ki yaaden

saundhi KHushbu ThanDi bunden

kal ke basi aansu jin se

farda ke baalin ka parda bhig raha hai

sehr-zada mahbus hasina

sapnon ke shilaT ki rani

aainon mein husn-e-shikasta dekh rahi hai

kitne chehre TuTe TuTe

pahchane an-pahchane se

aage pichhe aage pichhe bhag rahe hain

qile ke aaseb ki surat kis ki siski kis ka nala

kamre ki KHamosh faza mein dar aaya hai

bichhDe logo piyare logo

chahen bhi to nam tumhaare jaan sakenge?

kaise manen tum ko hamare

ji lene ki mar lene ki

KHushi hui afsos hua hai

tum kya jaano

kis ke hath ka takiya

kis ke garm ashkon se bhig raha hai

khule dariche ki jali se chimTi aankho

ek lamhe ke kaunde mein tum

kin kin ajnabi chizon ko pahchan sakogi

jiwan-khel mein haare logo

bichhDe logo piyare logo

barkha ki lambi raaton mein

kamre ki KHamosh faza mein

pichhle pahr ke sannaTe mein

rote rote jagne wale

hum logon ko so lene do

aur sawera ho lene do