pighalta dhuan

duur shādāb pahāḌī pe banā ik bañgla

laal khaprailoñ pe phailī huī añgūr kī bel

sehn meñ bikhre hue miTTī ke rājā-rānī

muñh chiḌātī huī bachchoñ ko koī dīvānī

seb ke ujle daraḳhtoñ kī ghanī chhāñv meñ

paañv Daale hue tālāb meñ koī laḌkī

gore hāthoñ meñ sambhāle hue takiye kā ġhilāf

an-kahī bātoñ ko dhāgoñ meñ siye jaatī hai

dil ke jazbāt kā iz.hār kiye jaatī hai

garm chūlhe ke qarīñ baiThī huī ik aurat

ek paivand lagī saaḌī se tan ko Dhāñpe

dhundlī āñkhoñ se mirī samt take jaatī hai

mujh ko āvāz pe āvāz diye jaatī hai

ik sulagtī huī cigarette kā bal khātā dhuāñ

phailtā jaatā hai har samt mire kamre meñ

dur shadab pahaDi pe bana ek bangla

lal khaprailon pe phaili hui angur ki bel

sehn mein bikhre hue miTTi ke raja-rani

munh chiDati hui bachchon ko koi diwani

seb ke ujle daraKHton ki ghani chhanw mein

panw Dale hue talab mein koi laDki

gore hathon mein sambhaale hue takiye ka ghilaf

an-kahi baaton ko dhagon mein siye jati hai

dil ke jazbaat ka izhaar kiye jati hai

garm chulhe ke qarin baiThi hui ek aurat

ek paiwand lagi saDi se tan ko Dhanpe

dhundli aankhon se meri samt take jati hai

mujh ko aawaz pe aawaz diye jati hai

ek sulagti hui cigarette ka bal khata dhuan

phailta jata hai har samt mere kamre mein