pir-e-tasma-e-pa

mere kāñdhe pe baiThā koī

paḌhtā rahtā hai injīl o qur.ān o ved

makkhiyāñ kaan meñ bhinbhinātī haiñ

zaḳhmī haiñ kaan

apnī āvāz kaise sunūñ

raanā hindū thā akbar musalmān thā

sanjai vo pahlā insān thā

hastināpur meñ jis ne qabl-e-masīh

television banāyā

aur ghar baiThe ik andhe raaja ko

yudh kā tamāsha dikhāyā

aadmī chāñd par aaj utrā to kyā

ye taraqqī nahīñ

ab se pahle, bahut pahle

jab zarra TuuTā na thā

chashma jauhar kā phūTā na thā

farsh se arsh tak jā chukā hai koī

ye aur aisī bahut sī jahālat kī bāteñ

mere kāñdhe pe hotī haiñ

kāñdhe jhuke jā rahe haiñ

qad mirā raat din ghaT rahā hai

sar kahīñ paañv se mil na jaa.e

mere kandhe pe baiTha koi

paDhta rahta hai injil o quran o wed

makkhiyan kan mein bhinbhinati hain

zaKHmi hain kan

apni aawaz kaise sunun

rana hindu tha akbar musalman tha

sanjai wo pahla insan tha

hastinapur mein jis ne qabl-e-masih

telewision banaya

aur ghar baiThe ek andhe raja ko

yudh ka tamasha dikhaya

aadmi chand par aaj utra to kya

ye taraqqi nahin

ab se pahle, bahut pahle

jab zarra TuTa na tha

chashma jauhar ka phuTa na tha

farsh se arsh tak ja chuka hai koi

ye aur aisi bahut si jahaalat ki baaten

mere kandhe pe hoti hain

kandhe jhuke ja rahe hain

qad mera raat din ghaT raha hai

sar kahin panw se mil na jae