pluto

mire pyāre bachche

baḌā zulm tum par huā hai

ba-yak jumbish-e-sar tumheñ apnī masnad se ma.azūl honā paḌā hai

samajh meñ nahīñ aatā aisī ḳhatā kyā huī tum se

maanā ki tum apne bhā.iyoñ se Thagne the

yā phir tumhārā Thikānā muqarrar nahīñ thā

tum apnī hadoñ se bhaTak kar kisī aur ke dā.ere meñ

dar-andāz hote the

maiñ jāntā huuñ tumhāre badan par se andoh kā sail guzrā hai

lekin mirī baat kā tum burā mat manānā

agar maiñ kahūñ ye ki tum pahle hī din se is masnad-e-āliya ke taqaddus

ke laa.eq nahīñ the

so jitne baras tum ne is svāñg meñ karr-o-far se guzāre haiñ

un par qanā.at karo

aur zamīñ ke kisī dūr-uftāda goshe meñ

maktab ko jaate hue ek bachche kī āñkhoñ se

ye baat sun kar

agar ek aañsū girā hai

use saiñt kar tāqche meñ sajā lo

ḳhalāoñ ke yaḳh-basta be-nūr pātāl meñ ye sitāra tumhārā sahārā banegā

mere pyare bachche

baDa zulm tum par hua hai

ba-yak jumbish-e-sar tumhein apni masnad se mazul hona paDa hai

samajh mein nahin aata aisi KHata kya hui tum se

mana ki tum apne bhaiyon se Thagne the

ya phir tumhaara Thikana muqarrar nahin tha

tum apni hadon se bhaTak kar kisi aur ke daere mein

dar-andaz hote the

main jaanta hun tumhaare badan par se andoh ka sail guzra hai

lekin meri baat ka tum bura mat manana

agar main kahun ye ki tum pahle hi din se is masnad-e-aliya ke taqaddus

ke laeq nahin the

so jitne baras tum ne is swang mein karr-o-far se guzare hain

un par qanaat karo

aur zamin ke kisi dur-uftada goshe mein

maktab ko jate hue ek bachche ki aankhon se

ye baat sun kar

agar ek aansu gira hai

use saint kar taqche mein saja lo

KHalaon ke yaKH-basta be-nur patal mein ye sitara tumhaara sahaara banega