ek gae aur bakri

ik charāgah harī bharī thī kahīñ

thī sarāpā bahār jis kī zamīñ

kyā samāñ us bahār kā ho bayāñ

har taraf saaf nadiyāñ thiiñ ravāñ

the anāroñ ke be-shumār daraḳht

aur pīpal ke sāya-dār daraḳht

ThanDī ThanDī havā.eñ aatī thiiñ

tā.eroñ kī sadā.eñ aatī thiiñ

kisī naddī ke paas ik bakrī

charte charte kahīñ se aa niklī

jab Thahar kar idhar udhar dekhā

paas ik gaay ko khaḌe paayā

pahle jhuk kar use salām kiyā

phir salīqe se yuuñ kalām kiyā

kyoñ baḌī bī mizāj kaise haiñ

gaay bolī ki ḳhair achchhe haiñ

kaT rahī hai burī-bhalī apnī

hai musībat meñ zindagī apnī

jaan par aa banī hai kyā kahiye

apnī qismat burī hai kyā kahiye

dekhtī huuñ ḳhudā kī shaan ko maiñ

ro rahī huuñ buroñ kī jaan ko maiñ

zor chaltā nahīñ ġharīboñ kā

pesh aayā likhā nasīboñ kā

aadmī se koī bhalā na kare

us se paalā paḌe ḳhudā na kare

duudh kam duuñ to baḌbaḌātā hai

huuñ jo dublī to bech khātā hai

hathkandoñ se ġhulām kartā hai

kin fareboñ se raam kartā hai

us ke bachchoñ ko pāltī huuñ maiñ

duudh se jaan Dāltī huuñ maiñ

badle nekī ke ye burā.ī hai

mere allāh tirī duhā.ī hai

sun ke bakrī ye mājrā saarā

bolī aisā gila nahīñ achchhā

baat sachchī hai be-maza lagtī

maiñ kahūñgī magar ḳhudā-lagtī

ye charāgah ye ThanDī ThanDī havā

ye harī ghaas aur ye saaya

aisī ḳhushiyāñ hameñ nasīb kahāñ

ye kahāñ be-zabāñ ġharīb kahāñ

ye maze aadmī ke dam se haiñ

lutf saare usī ke dam se haiñ

us ke dam se hai apnī ābādī

qaid ham ko bhalī ki āzādī

sau tarah kā banoñ meñ hai khaTkā

vaañ kī guzrān se bachā.e ḳhudā

ham pe ehsān hai baḌā us kā

ham ko zebā nahīñ gila us kā

qadr ārām kī agar samjho

aadmī kā kabhī gila na karo

gaay sun kar ye baat sharmā.ī

aadmī ke gile se pachhtā.ī

dil meñ parkhā bhalā-burā us ne

aur kuchh soch kar kahā us ne

yuuñ to chhoTī hai zaat bakrī kī

dil ko lagtī hai baat bakrī kī

ek charagah hari bhari thi kahin

thi sarapa bahaar jis ki zamin

kya saman us bahaar ka ho bayan

har taraf saf nadiyan thin rawan

the anaron ke be-shumar daraKHt

aur pipal ke saya-dar daraKHt

ThanDi ThanDi hawaen aati thin

taeron ki sadaen aati thin

kisi naddi ke pas ek bakri

charte charte kahin se aa nikli

jab Thahar kar idhar udhar dekha

pas ek gay ko khaDe paya

pahle jhuk kar use salam kiya

phir saliqe se yun kalam kiya

kyon baDi bi mizaj kaise hain

gay boli ki KHair achchhe hain

kaT rahi hai buri-bhali apni

hai musibat mein zindagi apni

jaan par aa bani hai kya kahiye

apni qismat buri hai kya kahiye

dekhti hun KHuda ki shan ko main

ro rahi hun buron ki jaan ko main

zor chalta nahin gharibon ka

pesh aaya likha nasibon ka

aadmi se koi bhala na kare

us se pala paDe KHuda na kare

dudh kam dun to baDbaData hai

hun jo dubli to bech khata hai

hathkandon se ghulam karta hai

kin farebon se ram karta hai

us ke bachchon ko palti hun main

dudh se jaan Dalti hun main

badle neki ke ye burai hai

mere allah teri duhai hai

sun ke bakri ye majra sara

boli aisa gila nahin achchha

baat sachchi hai be-maza lagti

main kahungi magar KHuda-lagti

ye charagah ye ThanDi ThanDi hawa

ye hari ghas aur ye saya

aisi KHushiyan hamein nasib kahan

ye kahan be-zaban gharib kahan

ye maze aadmi ke dam se hain

lutf sare usi ke dam se hain

us ke dam se hai apni aabaadi

qaid hum ko bhali ki aazadi

sau tarah ka banon mein hai khaTka

wan ki guzran se bachae KHuda

hum pe ehsan hai baDa us ka

hum ko zeba nahin gila us ka

qadr aaram ki agar samjho

aadmi ka kabhi gila na karo

gay sun kar ye baat sharmai

aadmi ke gile se pachhtai

dil mein parkha bhala-bura us ne

aur kuchh soch kar kaha us ne

yun to chhoTi hai zat bakri ki

dil ko lagti hai baat bakri ki