hamari gay

rab kā shukr adā kar bhaa.ī

jis ne hamārī gaay banā.ī

us mālik ko kyuuñ na pukāreñ

jis ne pilā.īñ duudh kī dhāreñ

ḳhaak ko us ne sabza banāyā

sabze ko phir gaay ne khāyā

kal jo ghaas charī thī ban meñ

duudh banī ab gaay ke than meñ

sub.hān-allāh duudh hai kaisā

taaza garm safed aur mīThā

duudh meñ bhīgī roTī merī

us ke karam ne baḳhshī serī

duudh dahī aur mīThā maskā

de na ḳhudā to kis ke bas kā

gaay ko dī kyā achchhī sūrat

ḳhūbī kī hai goyā mūrat

daana dunkā bhūsī chokar

khā letī hai sab ḳhush ho kar

khā kar tinke aur ThaThre

duudh hai detī shaam savere

kyā hī ġharīb aur kaisī pyārī

sub.h huī jañgal ko sidhārī

sabze se maidān harā hai

jhiil meñ paanī saaf bharā hai

paanī maujeñ maar rahā hai

charvāhā chumkār rahā hai

paanī pī kar chārā char kar

shaam ko aa.ī apne ghar par

duurī meñ jo din hai kaaTā

bachche ko kis pyaar se chāTā

gaay hamāre haq meñ hai ne.amat

duudh hai detī khā ke banaspat

bachhḌe us ke bail banā.e

jo khetī ke kaam meñ aa.e

rab kī hamd-o-sanā kar bhaa.ī

jis ne aisī gaay banā.ī

rab ka shukr ada kar bhai

jis ne hamari gay banai

us malik ko kyun na pukaren

jis ne pilain dudh ki dhaaren

KHak ko us ne sabza banaya

sabze ko phir gay ne khaya

kal jo ghas chari thi ban mein

dudh bani ab gay ke than mein

subhan-allah dudh hai kaisa

taza garm safed aur miTha

dudh mein bhigi roTi meri

us ke karam ne baKHshi seri

dudh dahi aur miTha maska

de na KHuda to kis ke bas ka

gay ko di kya achchhi surat

KHubi ki hai goya murat

dana dunka bhusi chokar

kha leti hai sab KHush ho kar

kha kar tinke aur ThaThre

dudh hai deti sham sawere

kya hi gharib aur kaisi pyari

subh hui jangal ko sidhaari

sabze se maidan hara hai

jhil mein pani saf bhara hai

pani maujen mar raha hai

charwaha chumkar raha hai

pani pi kar chaara char kar

sham ko aai apne ghar par

duri mein jo din hai kaTa

bachche ko kis pyar se chaTa

gay hamare haq mein hai neamat

dudh hai deti kha ke banaspat

bachhDe us ke bail banae

jo kheti ke kaam mein aae

rab ki hamd-o-sana kar bhai

jis ne aisi gay banai