payam-e-amal

gar qaum kī ḳhidmat kartā hai

ehsān tū kis par dhartā hai

kyoñ ġhairoñ kā dam bhartā hai

kyoñ ḳhauf ke maare martā hai

uTh bāñdh kamar kyā Dartā hai

phir dekh ḳhudā kyā kartā hai

jo umreñ muft gañvā.egā

vo āḳhir ko pachhtā.egā

kuchh baiThe haath na aa.egā

jo DhūñDegā vo pā.egā

tū kab tak der lagā.egā

ye vaqt bhī āḳhir jā.egā

uTh bāñdh kamar kyā Dartā hai

phir dekh ḳhudā kyā kartā hai

jo mauqa pā kar kho.egā

vo ashkoñ se muñh dho.egā

jo so.egā vo ro.egā

aur kāTegā jo bo.egā

tū ġhāfil kab tak so.egā

jo honā hogā ho.egā

uTh bāñdh kamar kyā Dartā hai

phir dekh ḳhudā kyā kartā hai

ye duniyā āḳhir faanī hai

aur jaan bhī ik din jaanī hai

phir tujh ko kyoñ hairānī hai

kar Daal jo dil meñ Thānī hai

jab himmat kī jaulānī hai

to patthar bhī phir paanī hai

uTh bāñdh kamar kyā Dartā hai

phir dekh ḳhudā kyā kartā hai

gar qaum ki KHidmat karta hai

ehsan tu kis par dharta hai

kyon ghairon ka dam bharta hai

kyon KHauf ke mare marta hai

uTh bandh kamar kya Darta hai

phir dekh KHuda kya karta hai

jo umren muft ganwaega

wo aaKHir ko pachhtaega

kuchh baiThe hath na aaega

jo DhunDega wo paega

tu kab tak der lagaega

ye waqt bhi aaKHir jaega

uTh bandh kamar kya Darta hai

phir dekh KHuda kya karta hai

jo mauqa pa kar khoega

wo ashkon se munh dhoega

jo soega wo roega

aur kaTega jo boega

tu ghafil kab tak soega

jo hona hoga hoega

uTh bandh kamar kya Darta hai

phir dekh KHuda kya karta hai

ye duniya aaKHir fani hai

aur jaan bhi ek din jaani hai

phir tujh ko kyon hairani hai

kar Dal jo dil mein Thani hai

jab himmat ki jaulani hai

to patthar bhi phir pani hai

uTh bandh kamar kya Darta hai

phir dekh KHuda kya karta hai