sher aur KHargosh

bahut hī baḌe ek jañgal meñ ik baar

bahut hī baḌā ek hī sher thā

bahut hī baḌī us kī moñchheñ bhī thiiñ

bahut hī baḌī pūñchh us sher kī

kabhī pūñchh uupar uThātā thā jab

to panchhī bhī peḌoñ pe Dar jaate the

nikaltā thā jab ġhaar se aur ġhurrātā thā

to jañgal meñ sab Dar ke chhup jaate the

bahut sahme sahme se rahte the sab

kabhī koī gīdaḌ kabhī lomḌī

kabhī niil gaay kabhī koī suar

kabhī ek do aur kabhī tiin tiin

jahāñ bhī mile jis qadar bhī shikār

vo jañgal kā raajā thā khā jaatā thā

koī bhī amn se na jī paatā thā

bahut soch kar sab ke sab ek din

sabhā meñ mile aur kiye faisle

agar sher bāhar na aayā kare

to har roz parchī nikālā kareñ

ki har roz bas ek hī jānvar

ḳhud hī sher ke ġhaar meñ bhej kar

chain se jī sakeñ

magar sher jī se ye kaise kaheñ

sabhā ke sabhī soch meñ paḌ ga.e

bahut der ba.ad

baḌe piir bakre jī bole ki maiñ

merī umr to yuuñ hī baaqī hai kam

mujhe khaa.e jaatā hai bachchoñ kā ġham

agar sher ne khā liyā bhī to kyā

sunāyā baḌe piir ne jā ke jañgal kā ye faisla

sher jī sun ke pahle to chauñke zarā

magar ġhaur se sochā jab mo.āmla

to samjhe chalo apnī mehnat bachī

ye jañgal bhī apnā hai raajā bhī ham

hameñ hī to hogā na parjā kā ġham

zabāñ pher kar ḳhushk hoñToñ pe bole

ḳhabar kar dī jā.egī jantā ko kal

magar aaj ke din halūm halūm

aaj to aap hī merī ḳhurāk ho

kahā aur bas khā gayā būḌhe bakre ko sher

din guzarte ga.e

log ghaTte ga.e mahīne ga.e

yuuñ hī roz ḳhurāk jaatī rahī sher ke ġhaar tak

ki ik din nikal aa.ī baarī jo ḳhargosh kī

vo ghabrā gayā

chalā dhīme dhīme se kachhve kī chaal

pahuñchte pahuñchte use ġhaar tak shaam hone lagī

use dekh kar sher bhannā gayā

chhaTañkī barābar ye ḳhurāk bhejī hai jañgal ne

aur is qadar der se

miTā dūñgā ḳhargosh kī zaat ko

maiñ jañgal kā jañgal hī khā jā.ūñgā

sunā aur ḳhargosh rone lagā

giḌgiḌāne lagā

huzūr is meñ merī nahīñ hai ḳhatā

na jañgal sabhā kā koī dosh hai

ki jañgal ne to saat ḳhargosh bheje magar

magar kyā

magar sir

magar kyā kyuuñ haklā rahe ho batāo mujhe

magar magar magar sir

kahāñ haiñ tumhāre chhe ġhaddār sāthī

vo ḳhargosh phir se sisakne lagā

hameñ rāste meñ huzūr ek

zālim ne rokā thā

aur bahut gāliyāñ aap ko diiñ

kahā maiñ dohrā.ūñ kaise vo sab kuchh huzūr

kahā jaao kah do mire sāthiyoñ ko vahī khā gayā

ye sunñā thā ki sher ġhurrāyā moñchhoñ meñ bal aa ga.e

akaḌne lagī us kī hunTerī pūñchh

aur āñkhoñ meñ bas ḳhuun utarne lagā

kahāñ hai kidhar hai batā kaun hai

mire hote kis kā huā hausla

ki merī re.āyā pe koī zulm kar sake

vo hai aap kī zaat kā sir magar

maiñ m maiñ maiñ vo kahtā thā sir

j j jañgal kā raajā asl

maiñ vo vo hai

lapak ke uThā sher bolā batā

kahāñ hai batā us ko kachchā chabā jā.ūñgā

vo pīpal kī pauḌī ke pīchhe

jo kuaañ hai nā

vahīñ pe chhupā hai vo kāyer huzūr

palak ke jhapakne meñ pahuñche kueñ pe

ḳhargosh aur sher

khaḌe ho ke kuñ.eñ pe us sher ne

jo paanī meñ dekhā to haañ sher thā

vo paanī meñ us kī hī parchhā.īñ thī

magar sher samjhā vahī dūsrā sher hai

dikhā.e jo us ne bhayānak se daañt

to us ne bhī dikhlā.e vaise hī daañt

ye ġhurrāyā ġhurrā.ī parchhā.īñ bhī

palaT ke kueñ se jo āvāz lauTī

vo samjhā vo aayā

ye kuudā chhapāk se paanī meñ aur

Duub ke mar gayā

ḳhushī se jo uchhlā hai ḳhargosh to

abhī tak uchhal kar hī chaltā hai vo

bahut hi baDe ek jangal mein ek bar

bahut hi baDa ek hi sher tha

bahut hi baDi us ki monchhen bhi thin

bahut hi baDi punchh us sher ki

kabhi punchh upar uThata tha jab

to panchhi bhi peDon pe Dar jate the

nikalta tha jab ghaar se aur ghurraata tha

to jangal mein sab Dar ke chhup jate the

bahut sahme sahme se rahte the sab

kabhi koi gidaD kabhi lomDi

kabhi nil gay kabhi koi suar

kabhi ek do aur kabhi tin tin

jahan bhi mile jis qadar bhi shikar

wo jangal ka raja tha kha jata tha

koi bhi amn se na ji pata tha

bahut soch kar sab ke sab ek din

sabha mein mile aur kiye faisle

agar sher bahar na aaya kare

to har roz parchi nikala karen

ki har roz bas ek hi jaanwar

KHud hi sher ke ghaar mein bhej kar

chain se ji saken

magar sher ji se ye kaise kahen

sabha ke sabhi soch mein paD gae

bahut der baad

baDe pir bakre ji bole ki main

meri umr to yun hi baqi hai kam

mujhe khae jata hai bachchon ka gham

agar sher ne kha liya bhi to kya

sunaya baDe pir ne ja ke jangal ka ye faisla

sher ji sun ke pahle to chaunke zara

magar ghaur se socha jab moamla

to samjhe chalo apni mehnat bachi

ye jangal bhi apna hai raja bhi hum

hamein hi to hoga na parja ka gham

zaban pher kar KHushk honTon pe bole

KHabar kar di jaegi janta ko kal

magar aaj ke din halum halum

aaj to aap hi meri KHurak ho

kaha aur bas kha gaya buDhe bakre ko sher

din guzarte gae

log ghaTte gae mahine gae

yun hi roz KHurak jati rahi sher ke ghaar tak

ki ek din nikal aai bari jo KHargosh ki

wo ghabra gaya

chala dhime dhime se kachhwe ki chaal

pahunchte pahunchte use ghaar tak sham hone lagi

use dekh kar sher bhanna gaya

chhaTanki barabar ye KHurak bheji hai jangal ne

aur is qadar der se

miTa dunga KHargosh ki zat ko

main jangal ka jangal hi kha jaunga

suna aur KHargosh rone laga

giDgiDane laga

huzur is mein meri nahin hai KHata

na jangal sabha ka koi dosh hai

ki jangal ne to sat KHargosh bheje magar

magar kya

magar sir

magar kya kyun hakla rahe ho batao mujhe

magar magar magar sir

kahan hain tumhaare chhe ghaddar sathi

wo KHargosh phir se sisakne laga

hamein raste mein huzur ek

zalim ne roka tha

aur bahut galiyan aap ko din

kaha main dohraun kaise wo sab kuchh huzur

kaha jao kah do mere sathiyon ko wahi kha gaya

ye sunna tha ki sher ghurraya monchhon mein bal aa gae

akaDne lagi us ki hunTeri punchh

aur aankhon mein bas KHun utarne laga

kahan hai kidhar hai bata kaun hai

mere hote kis ka hua hausla

ki meri reaya pe koi zulm kar sake

wo hai aap ki zat ka sir magar

main m main main wo kahta tha sir

j j jangal ka raja asl

main wo wo hai

lapak ke uTha sher bola bata

kahan hai bata us ko kachcha chaba jaunga

wo pipal ki pauDi ke pichhe

jo kuan hai na

wahin pe chhupa hai wo kayer huzur

palak ke jhapakne mein pahunche kuen pe

KHargosh aur sher

khaDe ho ke kunen pe us sher ne

jo pani mein dekha to han sher tha

wo pani mein us ki hi parchhain thi

magar sher samjha wahi dusra sher hai

dikhae jo us ne bhayanak se dant

to us ne bhi dikhlae waise hi dant

ye ghurraya ghurrai parchhain bhi

palaT ke kuen se jo aawaz lauTi

wo samjha wo aaya

ye kuda chhapak se pani mein aur

Dub ke mar gaya

KHushi se jo uchhla hai KHargosh to

abhi tak uchhal kar hi chalta hai wo