پریم گیت

آؤ پیارے بھاگ چلیں آکاش کے پلے پار

جگ کی راہیں کٹھن ہیں پیتم جیون ہے اک بھوگ

بھوگ بھی کیسا جس کو دنیا کہتی ہے اک روگ

من کی نیا ڈگ مگ ڈولے بیچ پڑے منجدھار

پیارے بیچ پڑے منجدھار

آؤ پیارے بھاگ چلیں آکاش کے پلے پار

نگری ہے یہ پاپ کی پیارے پاپ کا ہر سو آگ

آشا کی گر چاہت ہووے دکھ نہ اس سے لاگ

جانے بوجھے لاگ جو رکھے پھوٹے اس کا بھاگ

ڈھنگ یہاں کے نیارے ہیں اور نیارا ہے سنسار

پیارے نیارا ہے سنسار

آؤ پیارے بھاگ چلیں آکاش کے پلے پار

لوبھی ہیں اس بستی والے مایا کا بیوپار

تن بھی گندہ من بھی گندہ نیکی کا پرچار

پل پل بھاری پڑت ہے موکو دھرتی کا یہ بار

دیکھت مورا ہردے ڈوبے ڈوبے سب سنسار

پیت کی دنیا سب سے سندر پیت ہی جیون ہار

پیارے پیت ہی جیون ہار

آؤ پیارے بھاگ چلیں آکاش کے پلے پار