purani diwar

purānī bahut purānī kaa.ī lagī dīvār

lakhorī īñToñ kī

itihās ne apne lambe lambe hāthoñ se joḌoñ ko jis ke bāñdhā hai

aur gulābī bhūre sabz mile-jule dhabboñ se jis par laakh kahānī

likh Daalī hai

albelī kirneñ roz sub.h chupke se us par chaḌh jaatī haiñ

idhar udhar phir jhāñktī haiñ

aur ek ek karke dabe paañv

konoñ meñ is ke luk jaatī haiñ

dauḌ dauḌ kar āñkh-michaulī kheltī haiñ

lajjā se chuur latā nihuḌā.e sar muskātī hai

halke se us ke dāman se do-chār phuul Tapak jaate haiñ

sahar uThtā hai sabza

āsmān ne aaj use phir

rang latāfat ḳhushbū kā ye komal tohfa

bheñT kiyā hai

man us kā ye daulat

pā kar bhī bhar aatā hai

ye ānand anant nahīñ hai

magar yahī sparsh

hazāroñ tāroñ meñ jīvan duniyā ke

ras bhartā hai

aur phir is se aise raag nikalte haiñ

jo kabhī nahīñ marte

is dīvār ke saa.e meñ

is upvan meñ

sard khaḌe haiñ bilkul sīdhe

sākit chup

ashok baḌī gambhīr soch meñ gum

purāne mandir jaise

kañval kī kaliyāñ

harī harī saarī phailā.e

tair rahī haiñ

aur favvāra halke halke yuuñ chaltā hai

jaise sub.h ko bālak

soī maañ ke Dar se

sisak sisak kar bilke

purani bahut purani kai lagi diwar

lakhori inTon ki

itihas ne apne lambe lambe hathon se joDon ko jis ke bandha hai

aur gulabi bhure sabz mile-jule dhabbon se jis par lakh kahani

likh Dali hai

albeli kirnen roz subh chupke se us par chaDh jati hain

idhar udhar phir jhankti hain

aur ek ek karke dabe panw

konon mein is ke luk jati hain

dauD dauD kar aankh-michauli khelti hain

lajja se chur lata nihuDae sar muskati hai

halke se us ke daman se do-chaar phul Tapak jate hain

sahar uThta hai sabza

aasman ne aaj use phir

rang latafat KHushbu ka ye komal tohfa

bhenT kiya hai

man us ka ye daulat

pa kar bhi bhar aata hai

ye aanand anant nahin hai

magar yahi sparsh

hazaron taron mein jiwan duniya ke

ras bharta hai

aur phir is se aise rag nikalte hain

jo kabhi nahin marte

is diwar ke sae mein

is upwan mein

sard khaDe hain bilkul sidhe

sakit chup

ashok baDi gambhir soch mein gum

purane mandir jaise

kanwal ki kaliyan

hari hari sari phailae

tair rahi hain

aur fawwara halke halke yun chalta hai

jaise subh ko baalak

soi man ke Dar se

sisak sisak kar bilke