purani se nai paud tak

raat meñ ḳhvāb bhī the

raat jab baaġh ke hoñToñ pe tabassum na rahā

raat jab baaġh kī āñkhoñ meñ

tamāshā kā takallum na rahā

ġhunche kahne lage

ruknā hai hameñ baaġh meñ lā-sāl abhī

sub.h jab aa.ī to lā-sāl ke

jāñkāh mu'ammā kā fusūñ bhī TuuTā

sub.h ke naam se ab ġhunche bahut Darte haiñ

sub.h ke haath meñ

jarrāh ke nashtar se bahut Darte haiñ

vo jo ġhunchoñ ke mah-o-sāl kī kotāhī meñ

ek lamha thā bahut hī raushan

vahī ab in ke pighalte hue jismoñ meñ

gul-e-tāza ke bahrūp meñ

kin zaḳhmoñ se dil-gīr hai āshufta hai

raat meñ ḳhvāb bhī the

ḳhvāboñ kī tā'bīr bhī thī

sub.h se ġhunche bahut Darte haiñ

ġhunche ḳhush the ki ye phuul

hū-bahū in ke ḳhad-o-ḳhāl liye

in kā rang in kī talab

in ke par-o-bāl liye

in ke ḳhāmosh tabassum hī kī pinhā.ī meñ

kyā ḳhabar thī inheñ vo kaise samundar se

hue haiñ ḳhālī

jaise ik TuuTe hue daañt se

ye saarī chaTāneñ uTThīñ

jaise ik bhūle hue qahqahe se

saare sitāre ubhre

jaise ik dāna-e-angūr se

afsānoñ kā sailāb uThā

jaise ik bose ke manshūr se

dariyā jaage

aur ik dard kī fariyād se

insāñ phaile

inheñ in ġhunchoñ ko ummīd thī

vo phuul bhī in ke mānind

in kī ḳhud-fahmī kī jū.yā.ī se

paidā hoñge

in ke us vā'da-e-mubram hī kā

iifā hoñge

phuul jo apne hī vahmoñ ke takabbur ke sivā

kuchh bhī nahīñ

in kī in ġhunchoñ kī

dil-gīr sadā sunte haiñ

hañs dete haiñ

raat mein KHwab bhi the

raat jab bagh ke honTon pe tabassum na raha

raat jab bagh ki aankhon mein

tamasha ka takallum na raha

ghunche kahne lage

rukna hai hamein bagh mein la-sal abhi

subh jab aai to la-sal ke

jaankah mu'amma ka fusun bhi TuTa

subh ke nam se ab ghunche bahut Darte hain

subh ke hath mein

jarrah ke nashtar se bahut Darte hain

wo jo ghunchon ke mah-o-sal ki kotahi mein

ek lamha tha bahut hi raushan

wahi ab in ke pighalte hue jismon mein

gul-e-taza ke bahrup mein

kin zaKHmon se dil-gir hai aashufta hai

raat mein KHwab bhi the

KHwabon ki ta'bir bhi thi

subh se ghunche bahut Darte hain

ghunche KHush the ki ye phul

hu-bahu in ke KHad-o-KHal liye

in ka rang in ki talab

in ke par-o-baal liye

in ke KHamosh tabassum hi ki pinhai mein

kya KHabar thi inhen wo kaise samundar se

hue hain KHali

jaise ek TuTe hue dant se

ye sari chaTanen uTThin

jaise ek bhule hue qahqahe se

sare sitare ubhre

jaise ek dana-e-angur se

afsanon ka sailab uTha

jaise ek bose ke manshur se

dariya jage

aur ek dard ki fariyaad se

insan phaile

inhen in ghunchon ko ummid thi

wo phul bhi in ke manind

in ki KHud-fahmi ki juyai se

paida honge

in ke us wa'da-e-mubram hi ka

ifa honge

phul jo apne hi wahmon ke takabbur ke siwa

kuchh bhi nahin

in ki in ghunchon ki

dil-gir sada sunte hain

hans dete hain