pursa

bistar par muTThī bhar haDDiyāñ rah ga.iiñ

to masīhā ne batāyā

ab miTTī par zyāda haq miTTī kā hai

so ham ne miTTī par miTTī liip kar us par ek charāġh

kā katba likkhā

rāt!!! sub.h tak havā phūñktī phirtī thī

aur sitāre hamārī hatheliyoñ par paḌe maile

hote rahe

āñ.suoñ ko sabr kā kafan kahāñ se deñ

phuul apnī ḳhushbū chhoḌtā hai hañsī nahīñ chhoḌtā

ġham-zado!!! charāġh āñkhoñ ko sauñp do

ki aañsū sirf charāġh rotā hai

jis haath par charāġh dharā thā

vo haath hamārī chhat thā

dar-o-dīvār par chhat na rahe

to bādal bhī hausla haar dete haiñ

tumhāre āsmān par rote hue ḳhayāl aayā

merā āsmān bhī kitnā būḌhā ho gayā hai

kuchh aañsū bachā le mere dost!

bistar par muTThi bhar haDDiyan rah gain

to masiha ne bataya

ab miTTi par zyaada haq miTTi ka hai

so hum ne miTTi par miTTi lip kar us par ek charagh

ka katba likkha

raat!!! subh tak hawa phunkti phirti thi

aur sitare hamari hatheliyon par paDe maile

hote rahe

aansuon ko sabr ka kafan kahan se den

phul apni KHushbu chhoDta hai hansi nahin chhoDta

gham-zado!!! charagh aankhon ko saunp do

ki aansu sirf charagh rota hai

jis hath par charagh dhara tha

wo hath hamari chhat tha

dar-o-diwar par chhat na rahe

to baadal bhi hausla haar dete hain

tumhaare aasman par rote hue KHayal aaya

mera aasman bhi kitna buDha ho gaya hai

kuchh aansu bacha le mere dost!