pura chand

puurā chāñd

puurā chāñd nahīñ diyā tum ne mujhe

merī ye nādān shikāyat yaad hai tumheñ

chhoTe se ghar kī TuuTī huī chhat se

chāñd ko TukḌoñ meñ dekhā kartī thī

tum mujhe dekhte rahte

maiñ chhat meñ kuchh DhūñDhā kartī thī

haath baḌhā kar chhū luuñ jī kartā thā

tumhāre haath meñ piroī uñgliyāñ

chhūTā nahīñ kartī thī

kitnī rāteñ isī armān meñ guzrī

torch se nikaltī raushnī kī tarah

mere chehre par bikhrī thoḌī sī chāñdnī ko

apnī uñgliyoñ se chhū kar

tum kahte the puurā chāñd

aur tumhārī bāhoñ kī ThanDak meñ

vo armān gum-shuda hotā gayā

rassī pe Tañgī tumhārī safed qamīs

dekhe binā niiñd nahīñ aatī ab

tumhāre pyaar ke ujāloñ se behtar

koī aur nuur hogā

rāt-bhar kā umr-bhar kā

puure chāñd kā vo adhūrā armān

so gayā mere bhītar sukūn se

apnā bharā puurā āsmān oḌh kar

pura chand

pura chand nahin diya tum ne mujhe

meri ye nadan shikayat yaad hai tumhein

chhoTe se ghar ki TuTi hui chhat se

chand ko TukDon mein dekha karti thi

tum mujhe dekhte rahte

main chhat mein kuchh DhunDha karti thi

hath baDha kar chhu lun ji karta tha

tumhaare hath mein piroi ungliyan

chhuTa nahin karti thi

kitni raaten isi arman mein guzri

torch se nikalti raushni ki tarah

mere chehre par bikhri thoDi si chandni ko

apni ungliyon se chhu kar

tum kahte the pura chand

aur tumhaari bahon ki ThanDak mein

wo arman gum-shuda hota gaya

rassi pe Tangi tumhaari safed qamis

dekhe bina nind nahin aati ab

tumhaare pyar ke ujalon se behtar

koi aur nur hoga

raat-bhar ka umr-bhar ka

pure chand ka wo adhura arman

so gaya mere bhitar sukun se

apna bhara pura aasman oDh kar