pure badan ke sath aana

ham apne apne badan kī hadoñ meñ gum rah kar

bahut hasīn bahut hī mahīn jazboñ ko

ghuTan kī aag meñ jalne ko chhoḌ dete haiñ

ham apnī maiñ kī 'aqīdat meñ sajda-zan ho kar

qasam vujūd kī marne ko chhoḌ dete haiñ

hudūd-e-jism se bāhar nikal ke mil kisī din

dikhā nikāl ke siine se apne dil kisī din

ye baat pyaar meñ sunñe ko hai hasīñ jaanā

pe ham ne 'ishq kī tajsīm ko nahīñ maanā

vujūd-e-'ain kī yaktā.ī ko nahīñ maanā

ye rahguzār-e-mohabbat sabhī ke vāste hai

vujūd-e-vahdat-e-me'rāj biich rāste hai

kabhī jo aanā to puure badan ke saath aanā

kabhī jo aanā to puure badan ke saath aanā

hum apne apne badan ki hadon mein gum rah kar

bahut hasin bahut hi mahin jazbon ko

ghuTan ki aag mein jalne ko chhoD dete hain

hum apni main ki 'aqidat mein sajda-zan ho kar

qasam wujud ki marne ko chhoD dete hain

hudud-e-jism se bahar nikal ke mil kisi din

dikha nikal ke sine se apne dil kisi din

ye baat pyar mein sunne ko hai hasin jaana

pe hum ne 'ishq ki tajsim ko nahin mana

wujud-e-'ain ki yaktai ko nahin mana

ye rahguzar-e-mohabbat sabhi ke waste hai

wujud-e-wahdat-e-me'raj bich raste hai

kabhi jo aana to pure badan ke sath aana

kabhi jo aana to pure badan ke sath aana