pyara des

des apnā ham ko pyārā kyuuñ na ho

des apnā ham ko pyārā kyuuñ na ho

dil fidā is par hamārā kyuuñ na ho

''hind'' se baḌh kar nahīñ koī zamīn

go jahāñ jannat hī saarā kyuuñ na ho

kahte haiñ jis chiiz ko āb-e-hayāt

phir vo shai gañgā kī dhārā kyuuñ na ho

jis ne phailāyā jahāñ meñ nūr-e-ilm

aañkh kā duniyā kī taarā kyuuñ na ho

kab miTā saktā hai ham ko āsmāñ

go vo dushman hī hamārā kyuuñ na ho

hindū o muslim ko laḌte dekh kar

rañj se dil paarā paarā kyuuñ na ho

ham ne ye maanā kabhī laḌ bhī liye

az-sar-e-nau bhā.ī-chāra kyuuñ na ho

kyuuñ na ho ulfat adāvat kyuuñ rahe

dushmanī kyuuñ ho mudārā kyuuñ na ho

ham haiñ hindostān ke sachche sapūt

des kī ḳhidmat gavārā kyuuñ na ho

des apna hum ko pyara kyun na ho

des apna hum ko pyara kyun na ho

dil fida is par hamara kyun na ho

hind se baDh kar nahin koi zamin

go jahan jannat hi sara kyun na ho

kahte hain jis chiz ko aab-e-hayat

phir wo shai ganga ki dhaara kyun na ho

jis ne phailaya jahan mein nur-e-ilm

aankh ka duniya ki tara kyun na ho

kab miTa sakta hai hum ko aasman

go wo dushman hi hamara kyun na ho

hindu o muslim ko laDte dekh kar

ranj se dil para para kyun na ho

hum ne ye mana kabhi laD bhi liye

az-sar-e-nau bhai-chaara kyun na ho

kyun na ho ulfat adawat kyun rahe

dushmani kyun ho mudara kyun na ho

hum hain hindostan ke sachche saput

des ki KHidmat gawara kyun na ho