پیارا وطن ہمارا

لرزا تھا جس کے بچوں کا نام سن کے عالم

ہوتا تھا جن کے آگے شیروں کا ختم دم خم

جن کا اڑا ہمیشہ عرش بریں پہ پرچم

عظمت کا جن کی ڈنکا بجتا رہے گا دائم

ہندوستاں وہی ہے پیارا وطن ہمارا

جس ملک میں کروڑوں بے مثل تھے دلاور

لاکھوں تھے بھیم ارجن بلرام شیام رگھبرؔ

تھے تیر جن کے زیور بستر تھے جن کے خنجر

روئے زمیں پہ جن کا پیدا ہوا نہ ہمسر

ہندوستاں وہی ہے پیارا وطن ہمارا

جس ملک پر تھا نازاں اکبر سا شاہ اعظم

اڑتا تھا آسماں پر شہرت کا جس کی پرچم

تھا عدل کا زمانہ انصاف کا تھا عالم

ہندوؔ مسلماں دونوں رہتے تھے مل کے باہم

ہندوستاں وہی ہے پیارا وطن ہمارا

تھے کالیداس جیسے جس دیش میں سخنور

کیا چیز ان کے آگے یورپ کا شیکسپئیر

پامال ہو چکا ہے وہ گلستاں سراسر

اس غیر حال میں بھی ہے کل جہاں سے بہتر

ہندوستاں وہی ہے پیارا وطن ہمارا

گوتمؔ سے علم داں کو جس نے جنم دیا تھا

میراںؔ نے جس زمیں پر خوش ہو کے سم پیا تھا

پاتنجلیؔ کو پیدا جس ملک نے کیا تھا

عالم نے فلسفے کا جن سے سبق لیا تھا

ہندوستاں وہی ہے پیارا وطن ہمارا

گودی میں جس کی اب تک گاما سا پہلواں ہے

نظروں میں کل جہاں کی جو رستم زماں ہے

طاقت کا جس کی قائل ہر پیر اور جواں ہے

وہ سینکڑوں جوانوں پہ آج تک گراں ہے

ہندوستاں وہی ہے پیارا وطن ہمارا

وہ کوہ نور ہیرا جس نے کیا تھا پیدا

جس کی چمک سے اکثر شاہوں کا تاج چمکا

ہیروں میں کل جہاں کے مانا گیا ہے یکتا

ممکن نہیں ابد تک جس کا جواب ملنا

ہندوستاں وہی ہے پیارا وطن ہمارا

ٹیگور سے جہاں ہوں شاعر بھی اور ہنر ور

جس کی زمیں پہ اب تک گاندھیؔ ہے اور جواہر

ابوالکلامؔ جیسے جس ملک میں ہوں لیڈر

عظمت کا جن کی سکہ ہے کل جہاں کے دل پر

ہندوستاں وہی ہے پیارا وطن ہمارا

رانا نے جس زمیں پر کی تیغ آزمائی

جس ملک پر ہزاروں ویروں نے جاں گنوائی

صحرا میں جس کے موہن نے بانسری بجائی

مردہ دلوں میں الفت کی آگ سی لگائی

ہندوستاں وہی ہے پیارا وطن ہمارا

جس ملک میں تھیں لاکھوں سیتا سی پاک دامن

تیغوں کے سائے میں جو کرتی تھی دھرم پالن

شاداب ہو رہا تھا عصمت کا جن سے گلشن

قائل ہیں جن کی عصمت کے دوست اور دشمن

ہندوستاں وہی ہے پیارا وطن ہمارا

زرخیز ملک کوئی جس کے نہیں برابر

روز ازل سے اب تک سرسبز ہے سراسر

کانوں میں آج تک بھی جس کے ہیں سیم اور زر

جس کی زمیں اگلتی ہے لعل اور جواہر

ہندوستاں وہی ہے پیارا وطن ہمارا