pyas ki aag

maiñ ki huuñ pyaas ke dariyā kī taḌaptī huī mauj

pī chukā huuñ maiñ samundar kā samundar phir bhī

ek ik qatra-e-shabnam ko taras jaatā huuñ

qatra-e-shabnam-e-ashk

qatra-e-shabnam-e-dil ḳhūn-e-jigar

qatra-e-nīm-nazar

yā mulāqāt ke lamhoñ ke sunahrī qatre

jo nigāhoñ kī harārat se Tapak paḌte haiñ

aur phir lams ke nuur

aur phir baat kī ḳhushbū meñ badal jaate haiñ

mujh ko ye qatra-e-shādāb bhī chakh lene do

dil meñ ye gauhar-e-nāyāb bhī rakh lene do

ḳhushk haiñ hoñT mire ḳhushk zabāñ hai merī

ḳhushk hai dard kaa, naġhme kā gulū

maiñ agar pī na sakā vaqt kā ye āb-e-hayāt

pyaas kī aag meñ Dartā huuñ ki jal jā.uñgā

main ki hun pyas ke dariya ki taDapti hui mauj

pi chuka hun main samundar ka samundar phir bhi

ek ek qatra-e-shabnam ko taras jata hun

qatra-e-shabnam-e-ashk

qatra-e-shabnam-e-dil KHun-e-jigar

qatra-e-nim-nazar

ya mulaqat ke lamhon ke sunahri qatre

jo nigahon ki hararat se Tapak paDte hain

aur phir lams ke nur

aur phir baat ki KHushbu mein badal jate hain

mujh ko ye qatra-e-shadab bhi chakh lene do

dil mein ye gauhar-e-nayab bhi rakh lene do

KHushk hain honT mere KHushk zaban hai meri

KHushk hai dard ka, naghme ka gulu

main agar pi na saka waqt ka ye aab-e-hayat

pyas ki aag mein Darta hun ki jal jaunga