qadamat-e-mohabbat

mahaktī thī fazā pur-kaif manzar thā bahāroñ kā

simaT kar aa gayā thā nuur zarroñ meñ sitāroñ kā

fazāoñ meñ tarannum thā parinde chahchahāte the

havā ke sard jhoñke be-ḳhudī kā giit gaate the

vo rut aamoñ kī sāvan kā mahīna shaam bhīgī sī

chaman meñ motiyoñ se pur thī jholī ġhuncha-o-gul kī

surūr-o-kaif meñ khoyā huā thā dil-kushā manzar

masarrat-āfrīñ thā sar-ba-sar barsāt kā manzar

achānak us ko aise vaqt pahlī baar dekhā thā

ḳhudā ma.alūm kyā jaadū bharā vo husn-e-rā.anā thā

bichhī jaatī thī mausam kī nazākat us ke qadmoñ meñ

machaltī thī bahāroñ kī latāfat us ke qadmoñ meñ

usī ke dam se saarā gulsitāñ firdaus-manzar thā

chaman meñ inhisār-e-mausam-e-gul tak usī par thā

dil āñkhoñ se ye kahtā thā nigāh-e-ġhaur se dekho

kahīñ is ruup meñ doshīza-e-fitrat na aa.ī ho

utar aaya na har farsh-e-zamīñ par chāñd kā TukḌā

koī bhaTkā huā jalva na ho gulzār-e-jannat kā

surayyā kā koī partav na ham-āġhosh-e-fitrat ho

koī anjum na bhūle se ziyā-bar-dosh-e-fitrat ho

vo jalva jis ko ḳhud ra.anā.ī-e-fitrat pe pyaar aa.e

vo jis ke ḳhair-maqdam ko do-ālam kī bahār aa.e

vo qudrat thī ḳhudā kī jis pe ḳhud qudrat tasadduq thī

vo barakat thī yaqīnan jis pe har barakat tasadduq thī

vo sūrat thī jise nūr-e-ḳhudā shān-e-ḳhudā kahiye

jise taskīn dil kaa.e nazar kā mudda.ā kahiye

tamanna thī ki us ko dekh kar bas dekhte jaa.eñ

sharāb-e-be-ḳhudī pī kar na apne aap meñ aa.eñ

usī kā rang thā gul meñ kalī meñ ruup us kā thā

na husn-e-dilrubā aisā sunā hī thā na dekhā thā

vo ik muñh boltī tasvīr thī husn-o-nazākat kī

ḳhud āñkheñ ban ke jalva dekhne kī dil ko hasrat thī

kise is kī ḳhabar thī pyaar ban jā.egī ye hasrat

kise ma.alūm thā āzār ban jā.egī ye hasrat

'rishī' kis ko pata thā aañkh mil kar dil bhī aTkegā

bil-āḳhir ḳhār-e-ulfat umr-bhar siine meñ khaTkegā

mahakti thi faza pur-kaif manzar tha bahaaron ka

simaT kar aa gaya tha nur zarron mein sitaron ka

fazaon mein tarannum tha parinde chahchahate the

hawa ke sard jhonke be-KHudi ka git gate the

wo rut aamon ki sawan ka mahina sham bhigi si

chaman mein motiyon se pur thi jholi ghuncha-o-gul ki

surur-o-kaif mein khoya hua tha dil-kusha manzar

masarrat-afrin tha sar-ba-sar barsat ka manzar

achanak us ko aise waqt pahli bar dekha tha

KHuda malum kya jadu bhara wo husn-e-raana tha

bichhi jati thi mausam ki nazakat us ke qadmon mein

machalti thi bahaaron ki latafat us ke qadmon mein

usi ke dam se sara gulsitan firdaus-manzar tha

chaman mein inhisar-e-mausam-e-gul tak usi par tha

dil aankhon se ye kahta tha nigah-e-ghaur se dekho

kahin is rup mein doshiza-e-fitrat na aai ho

utar aaya na har farsh-e-zamin par chand ka TukDa

koi bhaTka hua jalwa na ho gulzar-e-jannat ka

surayya ka koi partaw na ham-aghosh-e-fitrat ho

koi anjum na bhule se ziya-bar-dosh-e-fitrat ho

wo jalwa jis ko KHud ranai-e-fitrat pe pyar aae

wo jis ke KHair-maqdam ko do-alam ki bahaar aae

wo qudrat thi KHuda ki jis pe KHud qudrat tasadduq thi

wo barakat thi yaqinan jis pe har barakat tasadduq thi

wo surat thi jise nur-e-KHuda shan-e-KHuda kahiye

jise taskin dil kae nazar ka muddaa kahiye

tamanna thi ki us ko dekh kar bas dekhte jaen

sharab-e-be-KHudi pi kar na apne aap mein aaen

usi ka rang tha gul mein kali mein rup us ka tha

na husn-e-dilruba aisa suna hi tha na dekha tha

wo ek munh bolti taswir thi husn-o-nazakat ki

KHud aankhen ban ke jalwa dekhne ki dil ko hasrat thi

kise is ki KHabar thi pyar ban jaegi ye hasrat

kise malum tha aazar ban jaegi ye hasrat

'rishi' kis ko pata tha aankh mil kar dil bhi aTkega

bil-aKHir KHar-e-ulfat umr-bhar sine mein khaTkega