qadr-o-qimat

sunā hai resham ke kīḌoñ ne

pattoñ kī hariyālī chāTī

shabnam ke qatroñ kī damak bhī

phūloñ ke rañgoñ ko churāyā

chāñd kī kirnoñ ke lachchhoñ se resham kaatā

aur ik thaan kiyā tayyār jis ko pā lene kī ḳhātir

shīrīñ ne farhād ko bechā

hiir ne hiire

lailā ne zulfoñ kī siyāhī

lekin saudā ho na sakā

ab phūloñ meñ rañg nahīñ hai

shabnam paanī ke qatroñ meñ Duub ga.ī hai

patte patte haiñ lekin be-āb-o-numū

chāñd hai lekin bhiik kā piyāla kirnoñ se mahrūm

sunā hai resham ke kiiḌe ye sochte haiñ

un shahroñ se kuuch kareñ

jin meñ un ke resham kā gāhak hī nahīñ hai

sunā hai shīrīñ hiir aur lailā apne nāmoñ ko badleñge

shāyad yūñhī un ke āshiq phir un ko pahchān sakeñ

suna hai resham ke kiDon ne

patton ki hariyali chaTi

shabnam ke qatron ki damak bhi

phulon ke rangon ko churaya

chand ki kirnon ke lachchhon se resham kata

aur ek than kiya tayyar jis ko pa lene ki KHatir

shirin ne farhad ko becha

hir ne hire

laila ne zulfon ki siyahi

lekin sauda ho na saka

ab phulon mein rang nahin hai

shabnam pani ke qatron mein Dub gai hai

patte patte hain lekin be-ab-o-numu

chand hai lekin bhik ka piyala kirnon se mahrum

suna hai resham ke kiDe ye sochte hain

un shahron se kuch karen

jin mein un ke resham ka gahak hi nahin hai

suna hai shirin hir aur laila apne namon ko badlenge

shayad yunhi un ke aashiq phir un ko pahchan saken