qahf-ul-qahat

pīr-baḳhsh building se pīr-baḳhsh ke marqad tak

apnī hī baḳhshish kī duāoñ ke karbzār se guzar kar aane vaalī

sar par guzishta maah o saal ke kitne hī thaal uThā.e

aaj bhī ek qabr-e-gum-gashta kā nishāñ aur apne mādūm kal ke liye ḳhitta-e-amāñ

ek saath DhūñD rahī hai

us ke nañge talvoñ se chhūne vaalī tapish kī lahar lahar use apne

khilaunoñ se mahrūm bachpan ke saath saath vo bahāreñ bhī yaad dilā jaatī hai

jab kisī an-dekhe jhoñke se mahak uThne kī ḳhvāhish meñ us ke sapne

pas-e-dīvār murjhā ga.e aur us ke baal chambelī ke phuul bante ga.e

aur phir us kī kalā.iyoñ meñ pahnī huī jhurriyoñ meñ talā.ī chūḌiyoñ

ke aks jhilmilāne lage

abhī abhī ek be-tartīb sāhūkār apne bikhre hue noToñ

ko tartīb dene kā jāñ-gusil farīza sar-anjām dete dete thak gayā

maa.ī maryam ne pahle to noToñ meñ muqayyad zarūratoñ se mulāqāt

kī ek aur koshish kī

aur phir ek nazar āsmān par Daalī jaise vahāñ bhī koī rahtā ho

us kī āñkhoñ se nikalne ke liye be-tāb hasratoñ meñ se

kuchh to un goliyoñ ko bhī bhigo ga.iiñ

jinheñ apne larazte hāthoñ meñ lete hī use yaqīn ho chalā thā

ki aaj raat use koī dard nahīñ satā.egā

aur sub.h ko khāñsī kā daura bhī nahīñ paḌegā

magar kahāñ...

bīmāriyāñ bhī aaj kal apne mizāj meñ bahut be-niyāz ho ga.ī haiñ

pir-baKHsh building se pir-baKHsh ke marqad tak

apni hi baKHshish ki duaon ke karbzar se guzar kar aane wali

sar par guzishta mah o sal ke kitne hi thaal uThae

aaj bhi ek qabr-e-gum-gashta ka nishan aur apne madum kal ke liye KHitta-e-aman

ek sath DhunD rahi hai

us ke nange talwon se chhune wali tapish ki lahar lahar use apne

khilaunon se mahrum bachpan ke sath sath wo bahaaren bhi yaad dila jati hai

jab kisi an-dekhe jhonke se mahak uThne ki KHwahish mein us ke sapne

pas-e-diwar murjha gae aur us ke baal chambeli ke phul bante gae

aur phir us ki kalaiyon mein pahni hui jhurriyon mein talai chuDiyon

ke aks jhilmilane lage

abhi abhi ek be-tartib sahukar apne bikhre hue noTon

ko tartib dene ka jaan-gusil fariza sar-anjam dete dete thak gaya

mai maryam ne pahle to noTon mein muqayyad zaruraton se mulaqat

ki ek aur koshish ki

aur phir ek nazar aasman par Dali jaise wahan bhi koi rahta ho

us ki aankhon se nikalne ke liye be-tab hasraton mein se

kuchh to un goliyon ko bhi bhigo gain

jinhen apne larazte hathon mein lete hi use yaqin ho chala tha

ki aaj raat use koi dard nahin sataega

aur subh ko khansi ka daura bhi nahin paDega

magar kahan

bimariyan bhi aaj kal apne mizaj mein bahut be-niyaz ho gai hain