qahqahe

duniyā se kar ke pyaar lagā.eñge qahqahe

ġham par hazār baar lagā.eñge qahqahe

duniyā hañsnegī apnī himāqat pe jab kabhī

ham aur be-shumār lagā.eñge qahqahe

kuchh ġham nahīñ hai ham ko zamāne kā dosto

patjhaḌ ho yā bahār lagā.eñge qahqahe

ghar vaale is maraz se pareshān huuñ to kyā

be-vaj.h baar baar lagā.eñge qahqahe

dekheñge ham latīfoñ bhare ḳhvāb raat bhar

phir sub.h mil ke yaar lagā.eñge qahqahe

kuchh fikr paas fail kī ham ko nahīñ huzūr

huuñ imtihāñ hazār lagā.eñge qahqahe

do din kī zindagī meñ rahe kyoñ udaas dil

jab hoñge be-qarār lagā.eñge qahqahe

daddy lageñge rail kā engine hameñ 'niyāz'

sulgegā jab sigār lagā.eñge qahqahe

duniya se kar ke pyar lagaenge qahqahe

gham par hazar bar lagaenge qahqahe

duniya hansnegi apni himaqat pe jab kabhi

hum aur be-shumar lagaenge qahqahe

kuchh gham nahin hai hum ko zamane ka dosto

patjhaD ho ya bahaar lagaenge qahqahe

ghar wale is maraz se pareshan hun to kya

be-wajh bar bar lagaenge qahqahe

dekhenge hum latifon bhare KHwab raat bhar

phir subh mil ke yar lagaenge qahqahe

kuchh fikr pas fail ki hum ko nahin huzur

hun imtihan hazar lagaenge qahqahe

do din ki zindagi mein rahe kyon udas dil

jab honge be-qarar lagaenge qahqahe

daddy lagenge rail ka engine hamein 'niyaz'

sulgega jab sigar lagaenge qahqahe