qaht-e-bangal

bañgāl kī maiñ shām-o-sahar dekh rahā huuñ

har chand ki huuñ duur magar dekh rahā huuñ

iflās kī maarī huī maḳhlūq sar-e-rāh

be-gor-o-kafan ḳhāk-ba-sar dekh rahā huuñ

bachchoñ kā taḌapnā vo bilaknā vo sisaknā

māñ-bāp kī māyūs nazar dekh rahā huuñ

insān ke hote hue insān kā ye hashr

dekhā nahīñ jaatā hai magar dekh rahā huuñ

rahmat kā chamakne ko hai phir nayyar-e-tābāñ

hone ko hai is shab kī sahar dekh rahā huuñ

ḳhāmosh nigāhoñ meñ umañDte hue jazbāt

jazbāt meñ tūfān-e-sharar dekh rahā huuñ

bedārī-e-ehsās hai har samt numāyāñ

be-tābī-e-arbābe-e-nazar dekh rahā huuñ

anjām-e-sitam ab koī dekhe ki na dekhe

maiñ saaf un āñkhoñ se magar dekh rahā huuñ

sayyād ne luuTā thā anādil kā nasheman

sayyād kā jalte hue ghar dekh rahā huuñ

ik teġh kī jumbish sī nazar aatī hai mujh ko

ik haath pas-e-parda-e-dar dekh rahā huuñ

bangal ki main sham-o-sahar dekh raha hun

har chand ki hun dur magar dekh raha hun

iflas ki mari hui maKHluq sar-e-rah

be-gor-o-kafan KHak-ba-sar dekh raha hun

bachchon ka taDapna wo bilakna wo sisakna

man-bap ki mayus nazar dekh raha hun

insan ke hote hue insan ka ye hashr

dekha nahin jata hai magar dekh raha hun

rahmat ka chamakne ko hai phir nayyar-e-taban

hone ko hai is shab ki sahar dekh raha hun

KHamosh nigahon mein umanDte hue jazbaat

jazbaat mein tufan-e-sharar dekh raha hun

bedari-e-ehsas hai har samt numayan

be-tabi-e-arbabe-e-nazar dekh raha hun

anjam-e-sitam ab koi dekhe ki na dekhe

main saf un aankhon se magar dekh raha hun

sayyaad ne luTa tha anadil ka nasheman

sayyaad ka jalte hue ghar dekh raha hun

ek tegh ki jumbish si nazar aati hai mujh ko

ek hath pas-e-parda-e-dar dekh raha hun