qaid

qaid hai qaid kī mī.ād nahīñ

jaur hai jaur kī fariyād nahīñ daad nahīñ

raat hai raat kī ḳhāmoshī hai tanhā.ī hai

duur mahbas kī fasīloñ se bahut duur kahīñ

sīna-e-shahr kī gahrā.ī se ghanToñ kī sadā aatī hai

chauñk jaatā hai dimāġh

jhilmilā jaatī hai anfās kī lau

jaag uThtī hai mirī sham-e-shabistān-e-ḳhayāl

zindagānī kī ek ik baat kī yaad aatī hai

shāh-rāhoñ meñ galī kūchoñ meñ insānoñ kī bhiiḌ

un ke masrūf qadam

un ke māthe pe taraddud ke nuqūsh

un kī āñkhoñ meñ ġham-e-dosh aur andesha-e-fardā kā ḳhayāl

saikḌoñ lākhoñ qadam

saikḌoñ lākhoñ qadam

saikḌoñ lākhoñ dhaḌakte hue insānoñ ke dil

jaur-e-shāhī se ġhamīñ jabr-e-siyāsat se niDhāl

jaane kis moḌ pe ye dhan se dhamākā ho jaa.eñ

sālhā-sāl kī afsurda o majbūr javānī kī umañg

tauq o zanjīr se lipTī huī so jaatī hai

karvaTeñ lene meñ zanjīr kī jhankār kā shor

ḳhvāb meñ ziist kī shorish kā pata detā hai

mujhe ġham hai ki mirā ganj-e-girāñ-māya-e-umr

nazr-e-zindāñ huā

nazr-e-āzādī-e-zindān-e-vatan kyuuñ na huā

qaid hai qaid ki miad nahin

jaur hai jaur ki fariyaad nahin dad nahin

raat hai raat ki KHamoshi hai tanhai hai

dur mahbas ki fasilon se bahut dur kahin

sina-e-shahr ki gahrai se ghanTon ki sada aati hai

chaunk jata hai dimagh

jhilmila jati hai anfas ki lau

jag uThti hai meri sham-e-shabistan-e-KHayal

zindagani ki ek ek baat ki yaad aati hai

shah-rahon mein gali kuchon mein insanon ki bhiD

un ke masruf qadam

un ke mathe pe taraddud ke nuqush

un ki aankhon mein gham-e-dosh aur andesha-e-farda ka KHayal

saikDon lakhon qadam

saikDon lakhon qadam

saikDon lakhon dhaDakte hue insanon ke dil

jaur-e-shahi se ghamin jabr-e-siyasat se niDhaal

jaane kis moD pe ye dhan se dhamaka ho jaen

salha-sal ki afsurda o majbur jawani ki umang

tauq o zanjir se lipTi hui so jati hai

karwaTen lene mein zanjir ki jhankar ka shor

KHwab mein zist ki shorish ka pata deta hai

mujhe gham hai ki mera ganj-e-giran-maya-e-umr

nazr-e-zindan hua

nazr-e-azadi-e-zindan-e-watan kyun na hua