qasam

qasam khātā huuñ maiñ hindostāñ kī shān-o-shaukat kī

qasam khātā huuñ himmat kī dilerī kī shujā.at kī

qasam khātā huuñ ai bhārat tirī aglī hikāyat kī

qasam khātā huuñ ai ġhairat tirī pur-josh jur.at kī

ki apnī azmat-e-ḳhufta ko nezoñ se jagā dūñgā

maza be-jā jasārat kā harīfoñ ko chakhā dūñgā

ġhazab kī bijliyāñ ban kar muḳhālif ko jalā dūñgā

na.ī duniyā nayā aalam na.ī bastī basā dūñgā

qasam khātā huuñ bhārat ke javānoñ kī javānī kī

qasam khātā huuñ maiñ sub.h-e-vatan kī shādmānī kī

qasam khātā huuñ maiñ fat.h-o-zafar kī kāmrānī kī

qasam khātā huuñ maiñ gang-o-jaman kī bhī ravānī kī

sipāhī sūrmā ban kar abhī maidāñ meñ jaatā huuñ

kamar meñ teġh-e-hindī haath meñ neza uThātā huuñ

kamāñ ko khīñchtā huuñ baan arjun kā chalātā huuñ

ġharaz yuuñ dushmanoñ ke ḳhuun kī naddī bahātā huuñ

qasam khata hun main hindostan ki shan-o-shaukat ki

qasam khata hun himmat ki dileri ki shujaat ki

qasam khata hun ai bhaarat teri agli hikayat ki

qasam khata hun ai ghairat teri pur-josh jurat ki

ki apni azmat-e-KHufta ko nezon se jaga dunga

maza be-ja jasarat ka harifon ko chakha dunga

ghazab ki bijliyan ban kar muKHalif ko jala dunga

nai duniya naya aalam nai basti basa dunga

qasam khata hun bhaarat ke jawanon ki jawani ki

qasam khata hun main subh-e-watan ki shadmani ki

qasam khata hun main fath-o-zafar ki kaamrani ki

qasam khata hun main gang-o-jaman ki bhi rawani ki

sipahi surma ban kar abhi maidan mein jata hun

kamar mein tegh-e-hindi hath mein neza uThata hun

kaman ko khinchta hun ban arjun ka chalata hun

gharaz yun dushmanon ke KHun ki naddi bahata hun