qaus-e-quzah

thī shaam qarīb aur dahqāñ

maidāñ meñ thā galle kā nigahbāñ

dekhī us ne kamān nāgāh

jo kartī hai meñh se ham ko āgāh

rañgat meñ use ajiib paayā

zāhir meñ bahut qarīb paayā

pahle se vo sun chukā thā akasr

hai qaus meñ ik piyāla-e-zar

mash.hūr bahut hai ye kahānī

afsāna-tarāsh kī zabānī

miltī hai jahāñ kamāñ zamīñ se

miltā hai vo jām-e-zar vahīñ se

sochā lo jaam aur banū jam

chhoḌo buzū go safand kā ġham

behūda gañvār is gumāñ par

sīdhā gayā tiir sā kamāñ par

din ghaTne lagā qadam baḌhāyā

ummīd ki ab ḳhazāna paayā

jitnī koshish ziyāda-tar kī

utnī hī kamāñ pare ko sarkī

pinhāñ huī qaus āḳhir-e-kār

aur zulmat-e-shab huī numūdār

nākām phir vo saada dahqāñ

hasrat-zada ġham-zada pashemāñ

thi sham qarib aur dahqan

maidan mein tha galle ka nigahban

dekhi us ne kaman nagah

jo karti hai meinh se hum ko aagah

rangat mein use ajib paya

zahir mein bahut qarib paya

pahle se wo sun chuka tha akasr

hai qaus mein ek piyala-e-zar

mashhur bahut hai ye kahani

afsana-tarash ki zabani

milti hai jahan kaman zamin se

milta hai wo jam-e-zar wahin se

socha lo jam aur banu jam

chhoDo buzu go safand ka gham

behuda ganwar is guman par

sidha gaya tir sa kaman par

din ghaTne laga qadam baDhaya

ummid ki ab KHazana paya

jitni koshish ziyaada-tar ki

utni hi kaman pare ko sarki

pinhan hui qaus aaKHir-e-kar

aur zulmat-e-shab hui numudar

nakaam phir wo sada dahqan

hasrat-zada gham-zada pasheman