qawwali

sabaq bas khelne khāne kā jis ko yaad hotā hai

baḌā ho kar vo laḌkā ek din ustād hotā hai

na aa.e master jis din paḌhāne mere darje meñ

zarā sī der ko us din merā dil shaad hotā hai

jo maulā-baḳhsh se vo pīTte haiñ mujh ko maktab meñ

koī samjhā.e un ko vaqt bhī barbād hotā hai

banāyā jaatā huuñ murġhā maiñ jis din apne maktab meñ

to us din dard se ye dil bahut nāshād hotā hai

samajh meñ kuchh nahīñ aatā ki maqsad kyā hai paḌhne kā

maza bhī kuchh nahīñ hai vaqt bhī barbād hotā hai

ḳhudā ke fazl se jis din buḳhār aatā hai teacher ko

to us din apnā maktab bhī bahut ābād hotā hai

jo halva rakh ke almārī meñ aapī band kartī haiñ

khilātī haiñ na khātī haiñ paḌā barbād hotā hai

agar hoñ mehrbāñ teacher to tum dekhoge ai 'nūrī'

sabaq jis ko nahīñ ho yaad vo bhī shaad hotā hai

sabaq bas khelne khane ka jis ko yaad hota hai

baDa ho kar wo laDka ek din ustad hota hai

na aae master jis din paDhane mere darje mein

zara si der ko us din mera dil shad hota hai

jo maula-baKHsh se wo piTte hain mujh ko maktab mein

koi samjhae un ko waqt bhi barbaad hota hai

banaya jata hun murgha main jis din apne maktab mein

to us din dard se ye dil bahut nashad hota hai

samajh mein kuchh nahin aata ki maqsad kya hai paDhne ka

maza bhi kuchh nahin hai waqt bhi barbaad hota hai

KHuda ke fazl se jis din buKHar aata hai teacher ko

to us din apna maktab bhi bahut aabaad hota hai

jo halwa rakh ke almari mein aapi band karti hain

khilati hain na khati hain paDa barbaad hota hai

agar hon mehrban teacher to tum dekhoge ai 'nuri'

sabaq jis ko nahin ho yaad wo bhi shad hota hai