qissa gul-baadshah ka

naam merā hai gul-bādshāh

umr merī hai terah baras

aur kahānī

merī umar kī tarah se muntashir muntashir

muḳhtasar muḳhtasar

merī be-nām be-chehra maañ

be-davā mar ga.ī

baap ne us ko burqe meñ dafnā diyā

us ko Dar thā ki munkir-nakīr

merī ammāñ kā chehra na dekheñ

vaise zinda thii, jab bhī vo madfūn thī

baap kā naam zar-tāj-gul

umar battīs baras

vo mujāhid shahādat kā tālib rāh-e-haq kā musāfir huā

aur jām-e-shahādat bhī us ne

apne bhaa.ī ke hāthoñ piyā

jo shumālī mujāhid thā

aur panj-vaqta namāzī bhī thā

mas.ala is shahādat kā pechīda hai

is ko behtar yahī hai yahīñ chhoḌ deñ

ab bahar-hāl baabā to jannat meñ hai

us ke hāthoñ meñ jām-e-tuhūr

us kī bāñhoñ meñ huur o qusūr

merī taqdīr meñ bam-dhamāke dhuāñ

pighaltī huī ye zamīn

bikhartā huā āsmāñ

bād-az-marg vo zinda hai

zindagī mujh se sharminda hai

2

kal sar-e-shām dushman ne aate hue

bam ke hamrāh barsā diye

mujh pe kuchh piile thaile

jin se mujh ko mile

gol roTī ke TukḌe

ek makkhan kī Tikiyā

ek sharbat kī botal

murabbe kā Dabbā

is ke badle meñ vo le ga.e

mere bhaa.ī kā dast-e-mashaqqat

jis meñ minnat kā Dorā bañdhā thā

merī chhoTī bahan kā vo paañv

jis se rañg-e-hinā phūTtā thā

log kahte haiñ ye amn kī jañg hai

amn kī jañg meñ hamla-āvar

sirf bachchoñ ko be-dast-o-pā chhoḌte haiñ

un ko bhūkā nahīñ chhoḌte

āḳhir insāniyat bhī koī chiiz hai

maiñ dahakte pahāḌoñ meñ tanhā

apne tarke kī bandūq thāme khaḌā huuñ

tamāshā-e-ahl-e-karam dekhtā thā

tamāshā-e-ahl-e-karam dekhtā huuñ

nam mera hai gul-baadshah

umr meri hai terah baras

aur kahani

meri umar ki tarah se muntashir muntashir

muKHtasar muKHtasar

meri be-nam be-chehra man

be-dawa mar gai

bap ne us ko burqe mein dafna diya

us ko Dar tha ki munkir-nakir

meri amman ka chehra na dekhen

waise zinda thi, jab bhi wo madfun thi

bap ka nam zar-taj-gul

umar battis baras

wo mujahid shahadat ka talib rah-e-haq ka musafir hua

aur jam-e-shahadat bhi us ne

apne bhai ke hathon piya

jo shumali mujahid tha

aur panj-waqta namazi bhi tha

masala is shahadat ka pechida hai

is ko behtar yahi hai yahin chhoD den

ab bahar-haal baba to jannat mein hai

us ke hathon mein jam-e-tuhur

us ki banhon mein hur o qusur

meri taqdir mein bam-dhamake dhuan

pighalti hui ye zamin

bikharta hua aasman

baad-az-marg wo zinda hai

zindagi mujh se sharminda hai

2

kal sar-e-sham dushman ne aate hue

bam ke hamrah barsa diye

mujh pe kuchh pile thaile

jin se mujh ko mile

gol roTi ke TukDe

ek makkhan ki Tikiya

ek sharbat ki botal

murabbe ka Dabba

is ke badle mein wo le gae

mere bhai ka dast-e-mashaqqat

jis mein minnat ka Dora bandha tha

meri chhoTi bahan ka wo panw

jis se rang-e-hina phuTta tha

log kahte hain ye amn ki jang hai

amn ki jang mein hamla-awar

sirf bachchon ko be-dast-o-pa chhoDte hain

un ko bhuka nahin chhoDte

aaKHir insaniyat bhi koi chiz hai

main dahakte pahaDon mein tanha

apne tarke ki banduq thame khaDa hun

tamasha-e-ahl-e-karam dekhta tha

tamasha-e-ahl-e-karam dekhta hun