qublai KHan ka KHwab ek fiqra coleridge ki tarz par

gul-nazar haiñ gul-dahan haiñ gul-badan

haiñ 'alīl-e-jazba-e-she'r-o-suḳhan

muñh-dikhā.ī husn-e-jāñ kī be-lagan

hai munādī is junūñ kī jān-e-man

teġh-bāzī kar chukā vo gul-badan

ab mahaktā hai lahū se pairahan

raqs karte the hazāroñ nīm-tan

us kā haa.e allah allah bāñk-pan

ham hī gul haiñ aur sabā haiñ aur chaman

ham hī aahū ham hī kul sayyād-o-ban

pattā pattā buuTā buuTā she’r-o-fan

jalva-gāh-e-teġh-e-dast-e-sīm-tan

sub.h kā niklā huā aur shaam ko

hai lahū meñ tar-ba-tar vo pairahan

ḳhvāhish-e-guftār se uTThā ḳhudā

aa ga.ī kun kī sadā phir daf'atan

go zabāñ aa.ī zamāne meñ tabhī

jab huā paidā ḳhudā kā ham-suḳhan

gir raheñgī us ke muñh se bijliyāñ

kuchh virāsat kuchh hunar hai kuchh phaban

yā'nī yā'nī ye ġhulām-e-murtazā

'jāzib'-e-āshufta-e-gang-o-jaman

gul-nazar hain gul-dahan hain gul-badan

hain 'alil-e-jazba-e-she'r-o-suKHan

munh-dikhai husn-e-jaan ki be-lagan

hai munadi is junun ki jaan-e-man

tegh-bazi kar chuka wo gul-badan

ab mahakta hai lahu se pairahan

raqs karte the hazaron nim-tan

us ka hae allah allah bank-pan

hum hi gul hain aur saba hain aur chaman

hum hi aahu hum hi kul sayyaad-o-ban

patta patta buTa buTa she’r-o-fan

jalwa-gah-e-tegh-e-dast-e-sim-tan

subh ka nikla hua aur sham ko

hai lahu mein tar-ba-tar wo pairahan

KHwahish-e-guftar se uTTha KHuda

aa gai kun ki sada phir daf'atan

go zaban aai zamane mein tabhi

jab hua paida KHuda ka ham-suKHan

gir rahengi us ke munh se bijliyan

kuchh wirasat kuchh hunar hai kuchh phaban

ya'ni ya'ni ye ghulam-e-murtaza

'jazib'-e-ashufta-e-gang-o-jaman