قبولیت سے دو ہاتھ کی دوری پر

میں شہر کے نواحی شور میں رہتا ہوں

روزانہ منوں کے حساب سے

خاموشی کا سیوریج

میرے گھر کے سامنے پڑاؤ ڈالتا ہے

جس میں ان کہی باتوں کے چھلکے

نوزائیدہ تکلیفوں کے ریپرز

اور چیختی شاموں کی خالی بوتلیں

بدبو دار گالیوں کو جنم دیتی ہیں

میں اپنی آواز کا نکاس چاہتا ہوں

لفظ اگر برسات سے پہلے

قریبی سماعتوں تک نہ پہنچیں

تو زبانوں کو دیمک لگ جاتی ہے

میں نے خدا سے گزارش کی ہے

بادلوں کی آمد سے قبل

مجھے سورج سے ملنے دیا جائے

تا کہ حرارت جوہڑوں کو خشک کرنے میں معاون ہو

مگر میونسپل کمیٹی کے دفتر میں

بیٹھنے والے فرشتے

چھٹیوں پر ہیں

شہر مجھ سے دو ہاتھ کی دوری پر ہے

لیکن میرے پاس لاؤڈ اسپیکر نہیں

سو میں اس چیخم دہاڑ کے منظر نامے پر

اپنی جگہ نہیں بنا سکتا

اگر یہ مسئلہ کچھ عرصے تک یوں ہی رہا

تو مجبوراً مجھے کشتی دریافت کرنا ہوگی

جسے دریا نے دھتکار دیا ہو

مگر میں ناخدا نہیں ہوں

زندگی مجھ سے کس قدر مذاق کرتی ہے

بھلا دو ہاتھ کی دوری کتنی دیر میں طے ہوتی ہے

مہربان ساعتوں کا انتظار مجھے

قبولیت سے دور کیوں رکھتا ہے