qudrat aur neamat

jal-thal huā hai āñgan

barsā hai ḳhuub paanī

kāġhaz kī ek kashtī

ham ko banā do baajī

kashtī pe baiTh kar ham

nikleñge sair karne

dekheñge baaġh saarā

vo dil-fareb jharne

taaza havā kā jhoñkā

kaliyoñ kā muskurānā

vo bhīnī bhīnī ḳhushbū

phūloñ kā dil lubhānā

sabze pe bikhrī shabnam

shāḳhoñ kā jhuul jaanā

uḌtī parī sī titlī

bhauñroñ kā gungunānā

āñkhoñ ko deñ jo ThanDak

gulshan ke ye nazāre

qudrat kī ne.amateñ haiñ

rāhat ke ye sahāre

shāḳheñ ladīñ hoñ phal se

chiḌiyoñ kā chahchahānā

ye zindagī kā manzar

ham ko sadā dikhānā

lāzim hai ham pe be-shak

shukr-e-ḳhudā adā ho

fazl-o-karam ho ham par

lab pe sadā duā ho

jal-thal hua hai aangan

barsa hai KHub pani

kaghaz ki ek kashti

hum ko bana do baji

kashti pe baiTh kar hum

niklenge sair karne

dekhenge bagh sara

wo dil-fareb jharne

taza hawa ka jhonka

kaliyon ka muskurana

wo bhini bhini KHushbu

phulon ka dil lubhana

sabze pe bikhri shabnam

shaKHon ka jhul jaana

uDti pari si titli

bhaunron ka gungunana

aankhon ko den jo ThanDak

gulshan ke ye nazare

qudrat ki neamaten hain

rahat ke ye sahaare

shaKHen ladin hon phal se

chiDiyon ka chahchahana

ye zindagi ka manzar

hum ko sada dikhana

lazim hai hum pe be-shak

shukr-e-KHuda ada ho

fazl-o-karam ho hum par

lab pe sada dua ho