qurb

tamām shab mire kamre ki zard khiḌkī par

kabhī havāoñ ke jhoñkoñ ne aa ke dastak dī

kabhī dhaḌaktī huī tīrgī ne sar paTḳhā

kabhī simaTtī bikhartī sī sard būñdoñ ne

ḳhamosh shīshe ki dīvār se gale mil kar

vo ek baat ba-andāz-e-mahramāna kahī

jo maiñ ne shab kī mahaktī huī ḳhamoshī meñ

rafīq-e-rāh-e-mohabbat se vālehāna kahī

vo raat jis meñ sar-e-dasht āsmāñ bādal

khanakte motiyoñ kī dil-navāz rimjhim meñ

zamīñ kī tishna dahānī ke raaz khol gayā

shafaq ke rañg murādoñ kī shab meñ ghol gayā

phir aaj raat falak par tanā hai ḳhema-e-abr

barastī būñdoñ se raushan haiñ zehn meñ sham.eñ

chhatoñ pe nāchtī phirtī haiñ be-zabāñ pariyāñ

lahū meñ raqs-kunāñ hai tamāzat-e-ḳhurshīd

ḳhumār-e-qurb-e-dil-ārā kī ho ga.ī tā.īd

laraztī būñdoñ ke ye jāñ-gudāz shīsh-mahal

khule hue haiñ kisī dard-āshnā ke liye

taras rahe haiñ kisī jashn-e-be-sadā ke liye

dayār-e-shab meñ baḌī der se udaas huuñ maiñ

nazar uThā ke mujhe dekh tere paas huuñ maiñ

tamam shab mere kamre ki zard khiDki par

kabhi hawaon ke jhonkon ne aa ke dastak di

kabhi dhaDakti hui tirgi ne sar paTKHa

kabhi simaTti bikharti si sard bundon ne

KHamosh shishe ki diwar se gale mil kar

wo ek baat ba-andaz-e-mahramana kahi

jo main ne shab ki mahakti hui KHamoshi mein

rafiq-e-rah-e-mohabbat se walehana kahi

wo raat jis mein sar-e-dasht aasman baadal

khanakte motiyon ki dil-nawaz rimjhim mein

zamin ki tishna dahani ke raaz khol gaya

shafaq ke rang muradon ki shab mein ghol gaya

phir aaj raat falak par tana hai KHema-e-abr

barasti bundon se raushan hain zehn mein shamen

chhaton pe nachti phirti hain be-zaban pariyan

lahu mein raqs-kunan hai tamazat-e-KHurshid

KHumar-e-qurb-e-dil-ara ki ho gai taid

larazti bundon ke ye jaan-gudaz shish-mahal

khule hue hain kisi dard-ashna ke liye

taras rahe hain kisi jashn-e-be-sada ke liye

dayar-e-shab mein baDi der se udas hun main

nazar uTha ke mujhe dekh tere pas hun main