qurb o buad

raat ko jab bhī aañkh khulī hai

mujh ko yuuñ mahsūs huā hai

jaise koī

mere sirhāne khaḌā huā hai

do āñhkeñ

mīThī nazroñ se

merā chehrā chuum rahī haiñ

do hāthoñ kī narmī

mere ruḳhsāroñ par phail ga.ī hai

do hoñToñ kī garmī

merī peshānī meñ jazb huī hai

zulfoñ kī lahrātī ḳhushbū

sāñsoñ meñ ras-bas sī ga.ī hai

kamre kī ḳhāmosh fazā meñ

gītoñ ke kuchh bol purāne

tair rahe haiñ

khiḌkī ke pardoñ ko jaise

abhī kisī ne Thiik kiyā hai

ātish-dāñ ke bujhte sho.ale

abhī abhī bhaḌkā.e ga.e haiñ

takiya jo bistar se girā thā

ab sar us pe dharā huā hai

kambal jo pairoñ meñ paḌā thā

saarā badan ab Dhāñp rahā hai

mujh ko yuuñ mahsūs huā hai

jaise tum

ab bhī kamre meñ khaḌī huī ho

ab bhī ghar meñ basī huī ho

lekin tum to chhoḌ ke mujh ko

duur purāne qabristāñ kī

simTī sukḌī ik turbat meñ

ik muddat se chhupī huī ho!

raat ko jab bhi aankh khuli hai

mujh ko yun mahsus hua hai

jaise koi

mere sirhane khaDa hua hai

do aanhken

miThi nazron se

mera chehra chum rahi hain

do hathon ki narmi

mere ruKHsaron par phail gai hai

do honTon ki garmi

meri peshani mein jazb hui hai

zulfon ki lahraati KHushbu

sanson mein ras-bas si gai hai

kamre ki KHamosh faza mein

giton ke kuchh bol purane

tair rahe hain

khiDki ke pardon ko jaise

abhi kisi ne Thik kiya hai

aatish-dan ke bujhte shoale

abhi abhi bhaDkae gae hain

takiya jo bistar se gira tha

ab sar us pe dhara hua hai

kambal jo pairon mein paDa tha

sara badan ab Dhanp raha hai

mujh ko yun mahsus hua hai

jaise tum

ab bhi kamre mein khaDi hui ho

ab bhi ghar mein basi hui ho

lekin tum to chhoD ke mujh ko

dur purane qabristan ki

simTi sukDi ek turbat mein

ek muddat se chhupi hui ho!