qutub-minar

ai qutub-mīnār ai bhārat kī azmat ke nishāñ

har ghaḌī sāya-fagan rahtā hai tujh par āsmāñ

tere har ik sang meñ pinhāñ hai terī dāstāñ

dīda-e-hairat se takte haiñ tujhe ahl-e-jahāñ

sar-bulandī par tirī ham hindiyoñ ko naaz hai

tū hamārī ḳhushnumā tārīḳh kā ġhammāz hai

terā maskan arz-e-dillī rashk-e-husn-e-koh-e-qāf

chāñd-sūraj roz tere gird karte haiñ tavāf

saarī duniyā ko hai terī azmatoñ kā e'tirāf

tujh se hotā hai hamārī qaumiyat kā inkishāf

terī sannā.ī zamāne ke liye pur-pech hai

aaj bhī paris kā tower tere aage hech hai

tū hamārī shān-o-shaukat kā hai tābinda gavāh

tujh se raushan hai hamāre ilm-o-fan kī shāhrāh

tujh pe paḌte hī chamak uThtī hai hairat se nigāh

tū hamārā pāsbāñ hai tū hamārā ḳhair-ḳhvāh

tarjumān-e-vaqt hai tū rahnumā-e-fan hai tū

haañ libās-e-sang meñ ik paikar-e-āhan hai tū

ai qutub-minar ai bhaarat ki azmat ke nishan

har ghaDi saya-fagan rahta hai tujh par aasman

tere har ek sang mein pinhan hai teri dastan

dida-e-hairat se takte hain tujhe ahl-e-jahan

sar-bulandi par teri hum hindiyon ko naz hai

tu hamari KHushnuma tariKH ka ghammaz hai

tera maskan arz-e-dilli rashk-e-husn-e-koh-e-qaf

chand-suraj roz tere gird karte hain tawaf

sari duniya ko hai teri azmaton ka e'tiraf

tujh se hota hai hamari qaumiyat ka inkishaf

teri sannai zamane ke liye pur-pech hai

aaj bhi paris ka tower tere aage hech hai

tu hamari shan-o-shaukat ka hai tabinda gawah

tujh se raushan hai hamare ilm-o-fan ki shahrah

tujh pe paDte hi chamak uThti hai hairat se nigah

tu hamara pasban hai tu hamara KHair-KHwah

tarjuman-e-waqt hai tu rahnuma-e-fan hai tu

han libas-e-sang mein ek paikar-e-ahan hai tu