rah-e-watan mein

rah-e-vatan meñ qadam se qadam milā ke chalo

nishān-e-azmat-e-hindostāñ uThā ke chalo

rah-e-vatan meñ qadam se qadam milā ke chalo

baḌho diloñ meñ azā.em kī bijliyāñ le kar

laboñ pe himmat-o-mehnat kī dāstāñ le kar

har ik mauj-e-masā.ib se khelte guzro

ajal bhī sāmne aa.e to muskurā ke chalo

rah-e-vatan meñ qadam se qadam milā ke chalo

bhulā do buġhz-o-adāvat kī dāstānoñ ko

jalā do firqa-parastī ke āshiyānoñ ko

har ek samt bikhero ḳhulūs ke naġhme

diloñ meñ jazba-e-mehr-o-vafā jagā ke chalo

rah-e-vatan meñ qadam se qadam milā ke chalo

kuchh aur bazm-e-vatan ko sañvārnā hai abhī

kuchh aur apne chaman ko nikhārnā hai abhī

ye ġhaflatoñ kā zamāna nahīñ vatan vaalo

dikhāo josh-e-amal ġhaflateñ miTā ke chalo

rah-e-vatan meñ qadam se qadam milā ke chalo

rah-e-watan mein qadam se qadam mila ke chalo

nishan-e-azmat-e-hindostan uTha ke chalo

rah-e-watan mein qadam se qadam mila ke chalo

baDho dilon mein azaem ki bijliyan le kar

labon pe himmat-o-mehnat ki dastan le kar

har ek mauj-e-masaib se khelte guzro

ajal bhi samne aae to muskura ke chalo

rah-e-watan mein qadam se qadam mila ke chalo

bhula do bughz-o-adawat ki dastanon ko

jala do firqa-parasti ke aashiyanon ko

har ek samt bikhero KHulus ke naghme

dilon mein jazba-e-mehr-o-wafa jaga ke chalo

rah-e-watan mein qadam se qadam mila ke chalo

kuchh aur bazm-e-watan ko sanwarna hai abhi

kuchh aur apne chaman ko nikhaarna hai abhi

ye ghaflaton ka zamana nahin watan walo

dikhao josh-e-amal ghaflaten miTa ke chalo

rah-e-watan mein qadam se qadam mila ke chalo