rah-rau

aaj maiñ duur bahut duur nikal aayā huuñ

be-talab tag-o-dau

dil meñ kāvish na talāsh

na koī ḳhvāhish maḳhfī na tamannā-e-ma.āsh

havas-e-ḳhām na saudā-e-tamām

yūñhī chaltā huā chaltā huā aa pahuñchā huuñ

pai-ba-pai gām-ba-gām

kis qadar duur nikal aayā huuñ

us se pahle bhī chalā huuñ maiñ na.ī rāhoñ par

shāh-rāhoñ se pare

ḳhār-zāroñ meñ ghisaTtī huī ik surḳh lakīr

ik sisaktī huī dil-doz nafīr

sarsarāte hue malbūs

mahaktī huī saañs

lazzat-o-karb kā maddham bam-o-zer

aaj lekin maiñ bahut duur nikal aayā huuñ

aur ik shaam sar-e-rāh-guzār

vo mirī laġhzish-e-pā merī vo be-rāh-ravī

ḳhud-farāmosh subuk-dosh-e-amal

apne ajdād ke nā-karda gunāhoñ kī uqūbat se barī

ik hiran chaukḌī bhartā huā ḳhāmosh-ḳhirām

shaam ke vaqt sar-e-rāh-guzār

maiñ bahut duur bhaTak niklā thā

aaj lekin maiñ bahut duur nikal aayā huuñ

aap se aap bahut duur bahut duur nikal aayā huuñ

shāh-rāhoñ se pare duur guzargāhoñ se

be-talab be-tag-o-dau

ḳhānqāhoñ se alag daur sanam-ḳhānoñ se

havas-e-ḳhām na saudā-e-tamām

yūñhī chaltā huā chaltā huā aa pahuñchā huuñ

pai-ba-pai gām-ba-gām

kis qadar duur bahut duur nikal aayā huuñ

aaj main dur bahut dur nikal aaya hun

be-talab tag-o-dau

dil mein kawish na talash

na koi KHwahish maKHfi na tamanna-e-maash

hawas-e-KHam na sauda-e-tamam

yunhi chalta hua chalta hua aa pahuncha hun

pai-ba-pai gam-ba-gam

kis qadar dur nikal aaya hun

us se pahle bhi chala hun main nai rahon par

shah-rahon se pare

KHar-zaron mein ghisaTti hui ek surKH lakir

ek sisakti hui dil-doz nafir

sarsaraate hue malbus

mahakti hui sans

lazzat-o-karb ka maddham bam-o-zer

aaj lekin main bahut dur nikal aaya hun

aur ek sham sar-e-rah-guzar

wo meri laghzish-e-pa meri wo be-rah-rawi

KHud-faramosh subuk-dosh-e-amal

apne ajdad ke na-karda gunahon ki uqubat se bari

ek hiran chaukDi bharta hua KHamosh-KHiram

sham ke waqt sar-e-rah-guzar

main bahut dur bhaTak nikla tha

aaj lekin main bahut dur nikal aaya hun

aap se aap bahut dur bahut dur nikal aaya hun

shah-rahon se pare dur guzargahon se

be-talab be-tag-o-dau

KHanqahon se alag daur sanam-KHanon se

hawas-e-KHam na sauda-e-tamam

yunhi chalta hua chalta hua aa pahuncha hun

pai-ba-pai gam-ba-gam

kis qadar dur bahut dur nikal aaya hun