ram

ā.īna-e-ḳhulūs-o-mohabbat yahāñ the raam

amn aur shāñtī kī zamānat yahāñ the raam

sachchā.iyoñ kī ek alāmat yahāñ the raam

ya.anī dil-o-nigāh kī chāhat yahāñ the raam

qadmoñ se raam ke ye zamīñ sarfarāz hai

hindostāñ ko un kī shujā.at pe naaz hai

un ke liye gunāh thā ye zulm-o-intishār

īsār un kā saare jahāñ par hai āshkār

dāman nahīñ thā un kā ta.assub se dāġh-dār

hirs-o-havas se duur the vo sāhab-e-vaqār

be-shak unhīñ ke naam se raushan hai nām-e-hind

iqbāl ne bhī un ko kahā hai imām-e-hind

la.al-o-guhar kī koī nahīñ thī talab unheñ

izzat ke saath dil meñ basāte the sab unheñ

bachpan se nā-pasand the ġhaiz-o-ġhazab unheñ

logoñ kā dil dukhānā gavārā thā kab unheñ

vo zālimoñ pe qahr ġharīboñ kī Dhaal the

kirdār-o-e'tibār kī raushan misāl the

un ko thā apnī rasm-e-uḳhuvvat pe e'timād

ḳhud khā ke jūThe ber diyā dars-e-ittihād

farz-āshnā the farz ko rakkhā hamesha yaad

kahne pe apnī maañ ke kahā ghar ko ḳhair-bād

ruḳhsat hue to lab pe na the shikva-o-fuġhāñ

ye hausla nasīb huā hai kise yahāñ

ban-bās par bhī lab pe na thā un kā ehtijāj

bhaa.ī ke haq meñ chhoḌ diyā apnā taḳht-o-tāj

karte rahe vo chaudah baras tak diloñ pe raaj

hindostāñ meñ hai koī un kī misāl aaj

rāh-e-vafā pe chal ke dikhāyā hai raam ne

kahte haiñ kis ko tyaag batāyā hai raam ne

rahbar ye shar-pasand kahāñ aur kahāñ vo raam

vo be-niyāz-e-aish-o-tarab zar ke ye ġhulām

vo paikar-e-vafā ye riyā-kār-o-bad-kalām

vo amn ke naqīb ye shamshīr-e-be-niyām

rasm-o-rivāj-e-rām se aarī haiñ shar-pasand

rāvan kī nītiyoñ ke pujārī haiñ shar-pasand

aaina-e-KHulus-o-mohabbat yahan the ram

amn aur shanti ki zamanat yahan the ram

sachchaiyon ki ek alamat yahan the ram

yani dil-o-nigah ki chahat yahan the ram

qadmon se ram ke ye zamin sarfaraaz hai

hindostan ko un ki shujaat pe naz hai

un ke liye gunah tha ye zulm-o-intishaar

isar un ka sare jahan par hai aashkar

daman nahin tha un ka tassub se dagh-dar

hirs-o-hawas se dur the wo sahab-e-waqar

be-shak unhin ke nam se raushan hai nam-e-hind

iqbaal ne bhi un ko kaha hai imam-e-hind

lal-o-guhar ki koi nahin thi talab unhen

izzat ke sath dil mein basate the sab unhen

bachpan se na-pasand the ghaiz-o-ghazab unhen

logon ka dil dukhana gawara tha kab unhen

wo zalimon pe qahr gharibon ki Dhaal the

kirdar-o-e'tibar ki raushan misal the

un ko tha apni rasm-e-uKHuwwat pe e'timad

KHud kha ke juThe ber diya dars-e-ittihad

farz-ashna the farz ko rakkha hamesha yaad

kahne pe apni man ke kaha ghar ko KHair-baad

ruKHsat hue to lab pe na the shikwa-o-fughan

ye hausla nasib hua hai kise yahan

ban-bas par bhi lab pe na tha un ka ehtijaj

bhai ke haq mein chhoD diya apna taKHt-o-taj

karte rahe wo chaudah baras tak dilon pe raj

hindostan mein hai koi un ki misal aaj

rah-e-wafa pe chal ke dikhaya hai ram ne

kahte hain kis ko tyag bataya hai ram ne

rahbar ye shar-pasand kahan aur kahan wo ram

wo be-niyaz-e-aish-o-tarab zar ke ye ghulam

wo paikar-e-wafa ye riya-kar-o-bad-kalam

wo amn ke naqib ye shamshir-e-be-niyam

rasm-o-riwaj-e-ram se aari hain shar-pasand

rawan ki nitiyon ke pujari hain shar-pasand